Aktori Çun Lajçi ka publikuar gjatë ditës së sotme një fotografi nga varri Smajl Demës së Koshutanit të Rugovës.
Sipas Lajçit Smajl Dema u vra në vitin 1961 nga UDB-ja serbe, derisa Lajçi thotë se ishte vet dëshmitar i ngjarjes.
Fotografia që ai ka postuar tregon varrin e Smajl Demës të dëmtuar rëndë, ndërsa pyet se kujt po i pengojnë viktimat e UDB-së?.
“Kush përfitoi nga spiunimi dhe për çka? I la vajzat jetime dhe ate ma t'bukurën, (që s'i gjindej edhe nji shoqe n'Rugovë), thonë ia shitën njenit nga Deva, e ai e çoi n'Shqipni. Atje e la dhe u kthye prap n'Devë, sepse ishte nye i dyfisht i UDB-së!”, shkruan Lajçi teksa tregon historinë e Smajl Demës.
Postimi i plotë:
Kujt i pengojnë viktimat e UDB-së
Mos shkruej thashë e si ta ndali dorën e s'i t'mos e kthej kohën, t'vërtetën që vret edhe sot?!
Ha çka s'hahet e mos shkruej thashë, por si t'mos shkruej për pranverën e viti 1961, për dorën e zgjatun t'UDB-së n'Rugovë që ia mori jetën Smajl Demës t'Koshutanit.
Si t'heshti, kur isha ai nxanësi me nji strajcë fletore n'krah, që po kthehesha nga shkolla, e të ura me ndali milicia: "Stani! Ovuda nemožeš".
Unë u ngjita shpatit. U mshefa ndër kaçuba dhe e shikova trupin pa jetë të Smajl Demës, që luejshin valët e lumit me shallin e bardhë e setrën e zezë!
Kush e vrau natën n'urë e kush e hudhi n'lum? Kurrë s'foli kush n'Drelaj! Se edhe aty ishin tre UDB-ash!
Kush përfitoj nga spiunimi dhe për çka? I la vajzat jetime dhe ate ma t'bukurën, (që s'i gjindej edhe nji shoqe n'Rugovë), thonë ia shitën njenit nga Deva, e ai e çoi n'Shqipni. Atje e la dhe u kthye prap n'Devë, sepse ishte nye i dyfisht i UDB-së!
Po shkruej, sepse sot dikush e paska vra për s'dyti herë. Ia paska thye pllakën që ia ngritën kusherijtë mbas 60-të vitësh! E ai dikushi, s'mund t'jetë nga Sërbia, as nga Dukagjini. Asht dikush nga klyshtë që i la UDB-ja n'Rugovë, që e djegë faji e me çdo kusht don me vra edhe emnin n'granit!
Si t'ha e t'mos shkruej kur vet e pashë kufomen e tij n'pranverën e vitit 1961, n'lumin e tërbuem!
Kujt i pengojnë viktimat e UDB-së?
07.11.2021
