Kryetari Lidhjes Demokratike të Kosovës (LDK), Lumir Abdixhiku deklaroi se Dragashi ka nevojë për transformim rrënjësor dhe premtoi se kjo komunë do të bëhet një prej qendrave kryesore për vizitorët e huaj nëse këtë të diele Bexhet Xheladini konfirmohet si kryetar komune.
Abdixhiku para elektoratit të LDK-së në Dragash, tha se fokusi kryesor i kandidatit për kryetar të komunës, nga kjo parti do të jetë zhvillimi ekonomik.
Abdixhiku: Fokusi kryesor i Xheladinit është zhvillimi ekonomik
“Doktor Bexheti do të qeverisë me plotë dinjitet, e rezultatet e arritura të tij do të jenë të prekshme qysh në ditët e para. Me dinjitet, meqenëse e dinjitetshme është e gjithë veprimtaria e tij jetësore. Të nderuar qytetarë, komuna juaj ka nevojë për transformim rrënjësor. Fokusi i Xheladinit do të jetë në zhvillimin ekonomik, përmirësimi i sistemit shëndetësor e arsimor si dhe mundësi më të mëdha për rininë. Bexheti ka program për të gjithë banorët pa dallim, ai Dragashin pretendon ta bëj një prej qendrave kryesore për vizitorët e huaj, dhe do ta bëjë, sepse ka vullnet të mirë me projekte konkrete”, theksoi Abdixhiku.
Kandidati për kryetar të Dragashit, Bexhet Xheladini tha se me programin e tyre zhvillimor kanë paraparë investime kapitale në vlerë dhjetëra milionë euro, për katër projekte më të rëndësishme për ujësjellës, ujëra të zeza, infrastrukturë rrugore dhe turizëm.
Xheladini: Projektin numër një për ujësjellës do ta bëjmë realitet në vitin e parë të qeverisjes
“Projektin numër një, të cilin do ta bëjmë realitet që nga viti i parë i qeverisjes, është projekti i ujësjellësit për 15 fshatrat e komunës sonë. Projekti i dytë është kanalizimi me sistem të pastrimit të ujërave të zeza në gjithë territorin e komunës së Dragashit, projekt që do të kushtoj rreth 6 milionë euro… I bëj thirrje të gjithë atyre që kanë të drejt vote të dalin në votime më 14 nëntor dhe të shprehin vullnetin e tyre për ndryshimin. Ndryshimi vjen nëse ju dilni votoni LDK dhe kandidatin e saj për kryetar të komunës së Dragashit”, tha ai.
Kandidati për kryetar të LDK-së, Bexhet Xheladini në raundin e parë të zgjedhjeve komunale më 17 tetor është renditur i pari me 34.76 përqind, pasuar nga kandidati i PDK-së Shaban Shabani me 33.69 përqind.
