Analisti Rrahman Paçarizi, ka folur për partitë politike pas zgjedhjeve.
Ai tha se të gjitha partitë politike i hoqën vijat e kuqe në zgjedhjet e 14 nëntorit.
“Ka diçka shumë të rëndësishme në këto zgjedhje, është heqja e vijave të kuqe të bashkëpunimin ndërmjet partive politike. Tashmë në praktikë asnjë parti politike që ka vija të kuqe, mund ta ketë ende në diskursin e vet çështjen e regjimit të ri, të vjetër, të partive kriminale, jo kriminale, të luftës e të tjera, por nëpër komuna të veçanta nuk ka parti që nuk ka bashkëpunuar me një parti tjetër”, u shpreh Paçarizi.
Ai heqjen vijave të kuqe e ka konsideruar si të arriturën më të madhe të këtyre zgjedhjeve.
“Heqja e vijave të kuqe për mua është e arritura më e madhe e këtyre zgjedhjeve, se kush ka fituar qytetarët kanë vendosur vet dhe vendimin do ta bartin pastaj në kurrizin e tyre”, u shpreh ai.
Paçarizi tha se partitë politike janë frikësuar të deklarohen se kanë pasur bashkëpunim me një parti tjetër.
“Në raundin e parë partitë i kanë matur forcat, por pastaj në raundin e dytë ka pasur bashkëpunim dhe nuk e kuptoj pse partitë kanë pasur kaq shumë frikë që ta dalin e të thonë se kemi pasur bashkëpunim. Ka qenë shumë më e ndershme që të kishin treguar”.
Tutje, ai duke komentuar rezultatet e zgjedhjeve tha se ka qenë e papritur që një parti si Lëvizja Vetëvendosje e cila vetëm tetë muaj më parë kishte marrë mëse 50 përqind të votave të besimit të qytetarëve të Kosovës, të dal kaq keq në këto zgjedhje.
