Task Forca për Mbrojtjen dhe Shfrytëzimin e Ligjshëm të Pyjeve në Kosovë ka aprovuar sot Planin e Veprimit për Parandalimin e Prerjeve Ilegale të Pyjeve në gjithë territorin e vendit tonë.
Ministri i Bujqësisë Faton Peci e vlerësoi miratimin e Planit të Veprimit për Parandalimin e Prerjeve Ilegale të Pyjeve, si një proces të rëndësishëm përmes të cilit përcaktohen veprimet dhe masat nga institucionet shtetërore të përfshira në Task Forcën për Mbrojtjen dhe Shfrytëzimin e Ligjshëm të Pyjeve.
“Çështja e pyjeve dhe mjedisit është duke u trajtuar me prioritet në kuadër të programit të Ministrisë dhe në kuadër të kësaj tashmë politikat e duhura zhvillimore për sektorin e pylltarisë i kemi adresuar qartë në ligje, në plane dhe strategji adekuate, përmes të cilave do të mundësojmë zhvillimin dhe implementimin e politikave të favorshme për sektorin e pylltarisë në vitet e ardhshme”, tha ministri Peci.
Ndryshe, aprovimit të Planit të Veprimit i kanë paraprirë edhe me dokumente tjera strategjike për zhvillimin dhe avancimin e sektorit të pylltarisë, sikurse plotësim-ndryshimin e Ligjit për Pyje, Strategjinë për Sektorin e Pylltarisë 2021-2030, dhe Strategjia për Komunikim në Pylltari.
Task-Forca për Mbrojtjen dhe Shfrytëzimin e Ligjshëm të Pyjeve në Kosovë, u formua me vendim qeveritar në korrik të këtij viti me iniciativë të ministrit Faton Peci.