Njëri nga anëtarët e familjeve të viktimave të vrarë pas luftës për motive politike, thotë se këto familje po ndihen të terrorizuara nga mediat si RTK-ja, analistët në disa media dhe nga Shoqata e Veteranëve të Luftës.
Xhevat Dajaku, vëllai i Besim Dajakut truproje e presidenti Rugova të vrarë në vitin 2003 bashkë me gazetarin e “Bota sot” Bekim Kastratin, kërkon ndihmën e Qeverisë që të merren masa ndaj abuzimeve të atilla.
Xhevat Dajaku, edhe vetë ish truproje e presidentit Rugova, pyet se pse RTK-ja, nuk i paraqet edhe rastet e të ekzekutuarve pas shpine gjatë luftës dhe pas saj.
Lexojeni reagimin e plotë të Xhevat Dajakut:
Qeveria e Kosovës duhet të ndërmarrë masa ndaj RTK-së dhe ndaj disa analistëve të mediave të ndryshme, si dhe ndaj shoqatës së veteranëve, dhe të ndalojnë terrorin mbi familjet e viktimave të vrarë pas dhe gjatë luftës, të cilët, në një formë, po i përkrahin "të dyshuarit" për krimet ndaj këtyre familjeve!...
Ku janë shoqatat e pavarura, ku janë shoqatat për të drejtat e njeriut, ku janë shoqatat për mbrojtjen e viktimave, ku është drejtësia që e ka fut kokën në prapanicën e kësaj propagande të tmerrshme?!!!
Pse RTK-ja, si televizion publik, nuk i paraqet, krahas këtyre spoteve për banorët e Hagës, edhe të ekzekutuarit pas shpine gjatë kohës së luftës dhe pasluftës, s'paku ta bënte një baraspeshë absurde!...
Xh. Dajaku
