Kryetari i Aleancës për Ardhmërinë e Kosovës, Ramush Haradinaj, përmes një postimi në facebook i ka reaguar kryeministrit, Albin Kurti, i cili njoftoi për rikthimin në funksion të Bllokut B.
“Lajmi i ditës do të ishte “nuk do të ketë shtrenjtim të rrymës në Kosovë” e jo u rikthye në prodhim Blloku B! Nuk është hera e parë që bjen e rikthehet ky bllok. Kryeministri i paska bërë disa pyetje hipotetike: Eh sikur ta kishim të renovuar Kosovën A…eh sikur ti kishim blloqet B-3, B-4… eh sikur…”, ka shkruar ndër tjerash Haradinaj, përcjellë “Bota sot”.
Pas kritikave kundër Kurtit, Haradinaj mori shumë komente kundërshtuese nga ndjekësit e tij në Facebook, të cilave ai nuk “përtoi” edhe t`u përgjigjet.
Kështu, në komente kreu i AAK-së shkroi se nuk e ka për qëllim që ta kundërshtojë kryeministrin në veprimet e tij, por se sipas tij është tallje lavdërimi i Kurtit se tash blejnë më pak rrymë.
“Të nderuar lexues e komentues, Nuk e kam për qëllim me e kundërshtu Kryeministrin në çdo gjë që bën. Kur e ka mirë unë e mbështes, siç ishte rasti me referendumin kushtetues të Serbisë. Por krekosja e Kryeministrit se tash blejmë rrymë më pak, është tallje. Qytetarit duhet t’i thuhet qartë se nuk do të ketë shtrenjtim të rrymës! Kjo është kryesorja, tjerat janë hajgare!”, shkroi Haradinaj.
