Presioni i Bashkimit Evropian ndaj Kosovës për themelimin e Asociacionit të Komunave me Shumicë Serbe nuk është i drejtë. Kështu vlerësojnë njohës të rrethanave politike në vend. Sipas Artan Muhaxhirit, nuk është aspak e drejtë që BE-ja të bëjë presion vetëm ndaj Kosovës për themelimin e asociacionit e në anën tjetër Serbia nuk po i zbaton zotimet e arritura në Bruksel.
“Nuk është aspak e moralshme dhe as pak fer që presioni t’i bëhet vetëm Kosovës, ndërkohë që dy palët e tjera bëhen indiferente ndaj zotimeve që janë premtuar në Bruksel”, ka thënë Muhaxhiri për Radio Kosovën.
Muhaxhiri vlerëson se institucionet e Kosovës duhet ta kushtëzojnë formimin e Asociacionit me liberalizimin e vizave.
“BE-ja ka të drejtë të insistojë në themelimin e asociacionit përderisa e bënë ndonjë hap të rëndësishëm për lehtësimin e qytetarëve të Kosovës posaçërisht në lëvizjen e lirë me anë të liberalizimit të vizave”, tha ai.
Ndërkaq, Dorajet Imeri mendon që Kosova e ka obligim formimin e asociacionit por, thekson se ky asociacion duhet të formohet në harmoni të plotë më Kushtetutën e Kosovës.
“Ata janë marrë vesh për themelimin e një asociacioni dhe ky asociacion duhet të jetë në harmoni me kushtetutën e vendit. Kosova nuk ka obligim ndërkombëtar që ta rrënojë sistemin e saj kushtetues, por e obligon ta formojë një asociacion”, tha Imeri për Radio Kosovën.
Kosova po vazhdon të përballet me presion nga bashkësia ndërkombëtare për sa i përket çështjes së themelimit të Asociacionit të Komunave me Shumicë Serbe. Zëdhënësi i BE-së, Peter Stano, ka thënë se është obligim ndërkombëtar i Kosovës që të zbatojë asociacionin pasi është ratifikuar në Kuvendin e Kosovës.
