Kushdo që harxhon më pak rrymë sesa vitin e kaluar, do të subvencionohet nga shteti.
Masa qeveritare që po përgatitet nga Ministria e Financave varet nga niveli i kursimit.
Ekzekutivi i ka propozuar Zyrës së Rregullatorit për Energji që blloktarifa të ngritet për 400 kilovatë më shumë.
“Blloku i parë tarifor të jetë 1000 kWh dhe i ndarë në 500 kWh gjatë ditës dhe 500 kWh gjatë natës, pasi konsiderojmë që për një afat kaq të shkurtër është e vështirë për familjet të përshtaten menjëherë”, shpjegoi ministri Hekuran Murati në konferencën e së martë
Tutje në komente propozohet që tarifa e lartë për bllokun e dytë të qytetarëve të zbritet nga 14, në 11.5 centë, që të jetë më e përballueshme.
Qeveria ka kërkuar gjithashtu nga ZRRE që në rritjen e çmimit të rrymës të përfshihen edhe bizneset, sipas kategorive.
Nga organet qeveritare, partitë e institucionet tjera, rregullatori i rrymës ka pranuar gjithsej 16 komente, të cilat do t’i shqyrtojë deri në vendimin përfundimtar.
