Një kontingjent tjetër i vaksinave kundër koronavirusit do të arrijnë të martën në Kosovë.
Bëhet fjalë për mbi 500 mijë doza të vaksinës Pfizer. Lajmin ka konfirmuar, Drin Podrimqaku, këshilltari i ministrit të Shëndetësisë, Rifat Latifi.
“Po të martën do të arrijnë 515,970 doza të vaksinës Pfizer”, ka thënë Podrimqaku. Ai ka bërë të ditur se këto vaksina janë donacion i Shteteve të Bashkuara të Amerikës.
“Janë donacion i ShBA-ve përmes mekanizmit të COVAX”, u shpreh Podrimqaku.
Autoritetet shëndetësore në Kosovë në gusht të vitit 2021 kishin pranuar 35 mijë doza të vaksinës kundër COVID-19, pjesë e donacionit të SHBA-ve për Kosovën.
Sekretari amerikan i Shtetit, Antony Blinken, kishte thënë se këto doza e sjellin 20 për qind më afër arritjes së qëllimit të Kosovës për vaksinimin.
“Sot SHBA dhuroi kontingjentin e parë nga 500,000 doza Pfizer për Kosovën, duke e sjellë atë 20 për qind më afër arritjes së qëllimit të saj të vaksinimit. E dhënë përmes COVAX, kjo dhuratë përfaqëson vlerat e përbashkëta dhe lidhjet e palëkundura midis njerëzve tanë. Së bashku mund ta mposhtim COVID-19”, kishte shkruar Blinken.
Kujtojmë se mars të vitit të kaluar, presidentja e Kosovë, Vjosa Osmani i ishte drejtuar presidentit amerikan Joe Biden me kërkesën që ta ndihmojë Kosovën në sigurimin e vaksinave.
Më shumë se 1.7 milion doza të vaksinës kundër COVID-19 janë dhënë që nga fillimi i vaksinimit kundër COVID-19 në Kosovë.
Ministria e Shëndetësisë ka njoftuar se vaksinimi mbetet mënyra më praktike dhe më efektive për t’u ballafaquar edhe më tej me pandeminë.
“Vaksinimi kundër COVID-19 mund të ulë rrezikun nga infektimi dhe përhapja e virusit që e shkakton COVID-19. Vaksinat, gjithashtu, ndihmojnë në parandalimin e sëmundjeve të rënda dhe vdekjes”, thuhej në njoftimin e MSh-së.
Vetëm në 24 orët e fundit janë dhënë 2,407 doza të vaksinës kundër COVID-19. Deri më sot 807.900 qytetarë janë vaksinuar me dozën e dytë.
Deri më sot janë dhënë 87.965 doza përforcuese dhe doza të treta të vaksinës kundër COVID-19.
