Bordi i RTK-së ka njoftuar se në mbledhjen e datës 7 shkurt u aprovuar propozimi për shkarkimin e drejtorit të Radio Kosovës, Ernest Lumën.
Në arsyetimin e shkarkimit të Lumës, U.D Drejtorit të Përgjithshëm, Shkumbin Ahmetxhekaj tha se: “Çdo i punësuar në RTK duhet ta ketë të qartë natyrën e funksionimit të transmetuesit publik, duke u kujdesur që të mos mbajë qëndrime politike, pasi kjo mund të dëmtojë imazhin e RTK-së si transmetues i pavarur publik”, përcjell “Bota sot”
Po ashtu, Bordi i RTK-së bëri të ditur se në këtë mbledhje u aprovua edhe propozimi për shpalljen e konkurseve për rekrutimin e stafit esencial në RTK 1 dhe RTK 2.
Komunikata e plotë e Bordit të RKT-së
Bordi i Radio Televizionit të Kosovës (RTK) në mbledhjen e datës 7 shkurt 2022, aprovoi propozimin e z. Shkumbin Ahmetxhekaj, Ushtrues i Detyrës së Drejtorit të Përgjithshëm në RTK, për shkarkimin e z. Ernest Luma nga pozita e Drejtorit të Radio Kosovës.
“Çdo i punësuar në RTK duhet ta ketë të qartë natyrën e funksionimit të transmetuesit publik, duke u kujdesur që të mos mbajë qëndrime politike, pasi kjo mund të dëmtojë imazhin e RTK-së si transmetues i pavarur publik.”, thuhet ndër të tjera në arsyetimin e U.D Drejtorit të Përgjithshëm për shkarkim që e ka aprovuar Bordi i RTK-së
Propozim vendimi për shkarkimin e z. Luma nga pozita e drejtorit të Radio Kosovës bazohet në nenin 33 paragrafi 1.2, nenin 31 paragrafi 2 nënparagrafi 2.2 dhe nëparagrafi 2.3, si dhe nenin18, paragrafi 8 të Ligjit 04/L-046 për Radiotelevizionin e Kosovës (G.Z. nr. 7, 27 prill 2012), nenin 8 paragrafi 2, nenin 19 paragrafi 9, nenin 20 paragrafi 12 dhe 14, nenin 22 paragrafi 1 dhe 2 të Statutit të Radiotelevizionit të Kosovës (nr. 0001/22 të datës 16.01.2022), nenin 7 paragrafi 1.1, 1.4 të Rregullores për Përgjegjësitë Materiale dhe Disiplinore të RTK-së (nr.0736/18 të datës 05.06.2018).
Në këtë takim Bordi i RTK-së, gjithashtu miratoi propozimin e u.d. Drejtorit të Përgjithshëm të RTK-së për shpalljen e konkurseve për rekrutimin e stafit esencial në RTK 1 dhe RTK 2. Në RTK 2 – kanali në gjuhën serbe, janë miratuar 30 pozita për staf esencial për funksionimit e këtij kanali., ndërsa në RTK 1 janë miratuar nëntë (9) pozita, gjashtë (6) prej tyre për staf esencial për komunitetet ashkali, egjiptian dhe goran. Ky vendim vije në vazhdën e vendimeve dhe kërkesave të Bordit të RTK-së për vënien e ligjshmërisë në RTK, veçanërisht sa i përket rekrutimit të stafit.
Gjithashtu bordi mori vendim që në përputhje me një analizë financiare dhe në përputhje me Ligjin e Prokurimit Publik, të fillojë përgatitjet e dokumentacionit të nevojshëm për tenderimin me procedura të rregullta të prokurimit publik për shërbimin e mbrojtjes dhe sigurimit fizik të pronave dhe hapësirave të RTK-së. Deri tash, ky shërbim është ofruar nga punonjës të angazhuar me kontrata për shërbime, të cilat nuk kanë ofruar asnjë beneficion sipas Ligjit të Punës për të angazhuarit në fjalë.
