Drejtori i Agjencisë Kosovare Kundër Korrupsionit, Yll Buleshkaj, ka pritur në takim shefin e Zyrës së BE-së, ambasadorin Tomas Szunyog, i cili ka shprehur gatishmërinë për të mbështetur punën e Agjencisë si një prej aktorëve kryesorë kundër korrupsionit në Kosovë, në aspektet teknike dhe e legjislacionit.
Buleshkaj shkurtimisht prezantoi punën e Agjencisë Kundër Korrupsionit dhe vizionin e tij për zhvillimin e agjencisë dhe punës kundër korrupsionit.
Ambasadori Szunyog e uroi drejtorin e sapozgjedhur të Agjencisë dhe i uroi suksese në detyrën e re.
Sipas një komunikate për media, Ambasadori Szunyog dhe drejtori Buleshkaj ranë dakord që të bashkëpunojnë edhe më tej me synimin e përbashkët drejt konsolidimit të kapaciteteve të Agjencisë për parandalimin dhe luftimin e korrupsionit në Kosovë, si dhe për një koordinim më të mirë ndërinstitucional të institucioneve të sundimit të ligjit të Kosovë.
