I akuzuari Naser Pajazitaj, i cili ishte dënuar me burgim të përjetshëm për vrasjen e Donjeta Pajazitajt më 2015 në Deçan, u deklarua i pafajshëm për akuzën e vrasjes, ndërsa e ka pranuar veprën penale të armëmbajtjes pa leje.
Këtë deklarim i akuzuari Pajazitaj e ka bërë të enjten në Gjykatën Themelore në Ferizaj, pasi që rigjykimi ka filluar rishtas nga fillimi, raporton “Betimi për Drejtësi”.
Pasi që palët në procedurë hoqën dorë nga leximi i aktakuzës, i akuzuari Naser Pajazitaj u deklarua sërish rreth fajësisë për çka e ngarkon akuza.
I njëjti tha se e pranon fajësinë vetëm për veprën penale të armëmbajtjes pa leje, e cila sipas dispozitivit të aktakuzës përshkruhet pushkë e gjuetisë, ndërsa tha se nuk pranon fajësinë për mbajtjen në pronësi pa leje të armës së tipit të panjohur.
Lidhur me pranimin e fajësisë për pikën 3 të aktakuzës, prokurorja Valbona Dishaj-Haxhosaj, mbrojtësi i viktimave Ibrahim Tërstena dhe avokati kryesor Gëzim Kollçaku nuk e kundërshtuan, e më pas e ka aprovuar kryetari i trupit gjykues Ibrahim Idrizi, i cili tha se dënimi për këtë vepër penale do të jepet në fund të gjykimit të kësaj çështje.
Kështu, gjykimi vazhdoi me fjalët hyrëse të palëve në procedurë, dhe atë: prokurorja Valbona Dishaj-Haxhosaj, mbrojtësi i viktimave Ibrahim Tërstena dhe avokati kryesor Gëzim Kollçaku mbetën pranë fjalës hyrëse të dhënë nga shqyrtimet e kaluara gjyqësore.
Andaj, shqyrtimi gjyqësorë vazhdoi tutje me paraqitjen e provave, ndërsa prokurorja Valbona Dishaj-Haxhosaj, propozoi që deklaratat e të dëmtuarve dhe të dëshmitarëve të cilët janë dëgjuar 3 herë dhe tani është hera e 4, këto deklarata të lexohen.
Këtë propozim e ka mbështetur mbrojtësi i viktimave Ibrahim Tërstena, poashtu avokati Gëzim Kollçaku tha se pajtohet në tërësi me propozimin e prokurores, e më pas e aprovoi kryetari i trupit gjykues Ibrahim Idrizi.
“Lidhur me këtë propozim, trupi gjykues vlerëson se i duhet kohë për të evidentuar në mënyrë të saktë deklaratat e dëshmitarëve me emër e mbiemër, dhe me procesverbale, dhe më pas të evidentohen në procesverbal sipas ligjit”, ka thënë gjyqtari Idrizi
Andaj, në këto rrethana seanca e sotme u ndërpre dhe e radhës u caktua më 28 dhe 29 prill 2022.
Ndryshe, në këtë seancë nuk morën pjesë të dëmtuarit, të njëjtin kanë paraqitur në gjykatë njoftim në bazë të cilit kanë informuar se më nuk do të marrin pjesë në shqyrtimet gjyqësore për këtë rast.
Pas kthimit të rastit në rigjykim, më 17 mars 2022, Gjykata e Apelit e ka hudhur si të palejuar kërkesën e avokatit të Pajazitajt, Gëzim Kollçaku, për përjashtimin e trupit gjykues.
Fillimisht, Gjykata Themelore në Pejë, në mars të vitit 2018, të akuzuarin Naser Pajazitaj, në mungesë të provave e kishte liruar nga akuzat për vrasjen e Donjeta Pajazitaj, por pas ankesës së prokurorisë, Gjykata e Apelit e kishte kthyer këtë lëndë në rigjykim.
Pas kthimit në rigjykim, Gjykata Themelore në Pejë, në mars të vitit 2019, e kishte shpallur fajtor të akuzuarin dhe e kishte dënuar me burgim të përjetshëm. Ky dënim ishte vërtetuar pastaj edhe nga Gjykata e Apelit në korrik të vitit 2019.
Por, në nëntor të vitit 2019, Gjykata Supreme i kishte prishur të dy aktgjykimet e Gjykatës Themelore në Pejë dhe të Gjykatës së Apelit dhe lëndën e kishte kthyer në rigjykim.
Pas kthimit të rastit në rigjykim, Gjykata Themelore në Pejë ishte përjashtuar nga ky rast dhe lënda ishte deleguar në Gjykatën Themelore në Ferizaj, me arsyetimin për të mënjanuar dyshimet ndaj sistemit të drejtësisë.
Vendimi për delegimin e lëndës në Ferizaj ishte marrë nga Gjykata e Apelit.
Gjykata Themelore në Ferizaj, më 27 maj 2021, e kishte dënuar Pajazitajn me burgim të përjetshëm për vrasje të rëndë.
Më pas, Gjykata e Apelit e ka kthyer çështjen në rigjykim.
Sipas aktakuzës së ngritur më 8 qershor 2017 nga prokurorja Valbona Disha Haxhosaj, Naser Pajazitaj po akuzohet se më 9 nëntor 2015, në bjeshkët e Strellcit, Komuna Deçan e pikërisht në vendin e quajtur te “Kroni i Lajthisë“, i pandehuri edhe pse më parë ka qenë i dënuar për vrasje, me dashje dhe me armë dhe atë revole të tipit të panjohur në mënyrë mizore e ka privuar nga jeta viktimën Donjeta Pajazitaj nga po i njëjti fshat.
Një gjë të tillë, sipas aktakuzës, Pajazitaj e ka bërë në atë mënyrë që derisa viktima ditën kritike ka qenë duke shkuar në punë në këmbë së bashku me axhën e saj dhe kur kanë arritur tek bunari i fshatit janë ndarë, ashtu që viktima ka vazhduar rrugën në drejtim të Strellcit të Epërm dhe kur afrohet përafërsisht 150 metra afër shtëpisë së Nedi Jusaj, aty pari kalon i pandehuri Naser Pajazitaj me veturën e tij të tipit xhip sheroke me ngjyrë të kaltër i cili ndalet e merr viktimën me veturë, e më pas vazhdon në drejtim të bjeshkëve të Strellcit dhe kur arrin tek “Kroni i Lajthisë” fillimisht e privon me armë duke shtënë dy herë në kokë, e më pas për të humbur gjurmë të njëjtën e mbulon me disa drunjë dhe largohet nga vendi i ngjarjes, kurse viktima më 27 dhjetor 2015 është gjetur pa shenja jete në vendin e ngjarjes nga disa kalimtarë të rastit.
Sipas aktakuzës, Pajazitaj akuzohet se më parë e gjerë më 9 nëntor 2015, në fshatin Strellc Komuna e Deçanit, pa autorizim ka poseduar armën dhe atë një revole të tipit të panjohur dhe një pushkë gjuetie me numër serik 0193117 si dhe 12 fishekë të kësaj pushke , në atë mënyrë që më revole ditën kritike ka kryer veprën penale të cekur si më lartë.
Gjithashtu, sipas aktakuzës më parë dhe gjerë më 23.05.2017, në fshatin Strellc i Ulët Komuna e Deçanit, i akuzuari pa autorizim ka poseduar armën dhe atë një armë AK-47 me numër serik 120331141 dhe 2 karikator të zbrazet, ashtu që policia gjatë bastisjes dhe kontrollit në shtëpinë e të pandehurit në dhomën e fjetjes ka gjetur dhe sekuestruar armën e cekur si më lartë.
Me këto veprime, prokuroria e ngarkon të akuzuarin se ka kryer veprën penale të “Vrasjes së rëndë” nga neni 179 i KPRK–së dhe për veprën penale “Mbajtja në pronësi, kontroll ose posedim të paautorizuar të armëve” nga neni 374 i KPRK–së.
