Pas vizitës së papritur në Serbi dhe takimit të sotëm me presidentin serb Aleksandër Vuçiq, emisari special i BE-së për dialogun Miroslav Lajçak është kthyer në Bruksel dhe nuk do të vizitojë Kosovën.
Zëdhënës i Përfaqësuesit të Lartë për Politikë të Jashtme e Siguri të BE-së, Peter Stano, konfirmoi për RTK, se Lajçak këtë e bën për shkak të takimeve të nesërme.
Stano tha se Lajçak ka takim me shefat e delegacioneve të të dy vendeve, përkatësisht zëvendëskryeministrin e Kosovës, Besnik Bislimi dhe drejtorin e Zyrës për Kosovën në Qeverinë e Serbisë, Petar Petkoviq. Megjithatë, Stano paralajmëroi vizitë tjetër të Lajçak-ut në rajon.
“Si pjesë e punës së tij, Emisari Special i BE-së do të vizitojë gjithashtu partnerët në rajon”, tha ai, por pa precizuar se kur Lajçak do të vizitojë sërish rajonin apo Kosovën në veçanti.
Ndryshe sot dhe nesër në Bruksel, mbahen takimet e grupeve punuese për çështjen e targave të automjeteve. Më 21 prill skadon afati gjashtëmujor i dakordimit të Kosovës e Serbisë për çështjen e targave, ku pas tensioneve të muajit shtator 2021, ishte vendosur përdorimi i stikersave.
