Kryetarja e shoqatës “Thirrjet e Nënave”, Nesrete Kumnova,ka apeluar sërish institucionet dhe në veçanti kryeministrin Albin Kurti që të kërkojë me këmbëngulje zbardhjen e fatit të personave të zhdukur gjatë luftës së fundit.
Në kodrën e Çabratit në Gjakovë, aty ku janë të varrosur mbi 50 martirë të lirisë, Kumnova thotë se të gjithë kriminelët kanë emër e mbiemër dhe të njëjtit duhen të dalin para drejtësisë dhe të marrin dënimin e merituar.
Kumnova: Të bëhet presion Serbisë që të kthejë më të dashurit tanë
“Në kodrën e Çabratit janë tri data ku janë vrarë e rrëmbyer, kemi ardhur t’i përkujtojmë dhe për t’i bërë thirrje institucioneve vendore dhe ndërkombëtare që të bëjnë presion, sinqerisht, jo formalisht, dhe të kërkojnë nga Serbia dhe t’i kthejnë më të dashurit tanë nga varrezat masive të Serbisë. Të gjitha shpresat janë të kryeministri Kurti, të cilin e kemi përkrahës prej ditëve të para, e kemi pas krahë të djathtë. Tash jemi të lumtur që e kemi kryeministër, dhe ta ngreh zërin për zbardhjen e fatit të të pagjeturve por edhe të kërkojë që kriminelët të dalin para drejtësisë dhe të marrinë dënimin e merituar, sepse të gjithë kanë emër dhe mbiemër, ata qe kanë hyrë në shtëpia dhe na kanë rrëmbyer më të dashurit tanë”, është shprehur Kumova.
Nesrete Kumnova ende nuk di asgjë për fatin e djalit të saj të vetëm, Albionit, i rrëmbyer me forcë nga paramilitarët serbë.
