Ka disa javë që Kosova ka aplikuar për të qenë pjesë e KiE.
Këtë e ka bërë me dije edhe Ministrja e Punëve të Jashtme dhe Diasporës, Donika Gërvalla.
Ajo theksoi që tashmë Kosova ka aplikuar të jetë pjesë e Këshillit të Evropës duke uruar që për të njejtin të mos ketë pengesa.
Mirëpo kjo temë padyshim që arriti të sjellë reagime të mëdha në Serbia, duke u deklaruar në vazhdimsi që janë kundër kësaj dhe se Kosova nuk duhet të jetë pjesë e KiE.
Në lidhje me këtë temë në një bashkëbisedim me “Bota sot”, ka folur kryetari I Podujevës, Shpejtim Bulliqi.
Ai thotë që Kosova ka shënuar sukses të madh duke u ngritur për 17 vende më lart për luftën ndaj krimit dhe korrupsionin, gjë që e favorizion këtë proces.
“Sa i përket anëtarësimit të Kosovës për në Këshillin e Evropës, disa prej organizatave ndërkombëtare që përcjellin indikatorët në luftën kundër krimit të organizuar dhe korrupsionit, Kosova ka shënuar sukses të madh duke u ngritur për 17 vende më lartë”, shprehet kryetari i Podujevës.
Ndër të tjera Bulliqi përmend edhe demokratizimin e institucioneve dhe lirinë e shprehjes në vendin tonë.
“Po ashtu edhe për demokratizimin e institucioneve dhe lirinë e shprehjes Kosova ka shënuar progres të dukshëm, andaj edhe uroj që këto parametra të vazhdojnë në trend pozitiv dhe shteti ynë së shpejti edhe të anëtarësohet në Këshillin e Evropës”, tha Bulliqi për “Bota sot”.
