Policia e Kosovës gjatë së premtes ka ndaluar tre persona të dyshimtë.
Një në Prishtinë e dy të tjerë janë intervistuar në Kamenicë.
Kjo pasi që të njëjtëve u është gjetur armë dhe municion.
Në rastin e parë është konfiskuar një pistoletë me dhjetë fishekë, ndërsa në të dytin janë sekuestruar dy pistoleta, 5 gëzhoja, 1 pushkë ajrore dhe një fishek.
Por, ky nuk është rasti i vetëm ku Policia e Kosovës ka konfiskuar armë.
Kaq armë e municion u konfiskuan nga policia në 4 muajt e parë të këtij viti
Vetëm brenda katër muajve të vitit 2022, Policia e Kosovës ka konfiskuar 462 armë dhe 6 mijë municione pa leje.
“Gjatë periudhës janar-prill të këtij viti janë konfiskuar 462 armë dhe 6 mijë municion pa leje”, thuhet në përgjigjen e Policisë.
Të pyetur se në cilat rajone të vendit janë konfiksuar më shumë armë, nga Policia nuk kanë dhënë ndonjë përgjigje.
Por, pse po vazhdojnë qytetarët e vendit të posedojnë armë pa leje?
Njohësi i sigurisë tregon se çfarë duhet të bëjë MPB-ja për t’i bindur qytetarët për t’i dorëzuar armët
Njohësi i sigurisë, Drizan Shala ka thënë se kampanjat e institucioneve të Kosovës dhe atyre ndërkombëtare nuk kanë arritur t’u ndihmojnë qytetarëve për dorëzimin e armëve.
“Në lidhje me armët ilegale që janë në duart e qytetareve të Kosovës kjo është si rezultat që asnjëherë institucionet nuk kanë pasur mundësi as ato vendore por edhe ndërkombëtare me i asgjësua përmes kampanjave të ndryshme që janë zhvilluar në Kosovë”, është shprehur Shala.
Ndërsa, ka treguar se çfarë duhet të bëjë Ministria e Punëve të Brendshme, në këtë drejtim.
“MPB-ja duhet urgjentisht të hartojë një program të thjesht me pak procedura teknike burokratike për të bindur qytetarin që të dorëzojë armën e tij dhe në këmbim të veprimit të merr armën nga shteti duke e futur nën kontroll institucional personin që posedon armën”, ka thënë ai.
Sipas, Shalës masë tjetër që do të ndihmonte në këtë çështje do të ishte edhe shtimi i patrullave në pika të ndryshme.
Ndërsa në anën tjetër masë preventive është shtimi i patrullave në pika të ndryshme duke bërë kontrollime gjithëpërfshirëse në gjetjen e personave që bartin armët ilegale.
Në vitin 2020 janë konfiskuar 1135 armë dhe 32747 municion, kurse vitin e kaluar (2021) janë konfiskuar 1280 armë dhe 42031 copë municion.
