Kryetari i LDK-së Lumir Abdixhiku ka pritur sot në takim ambasadorin e SHBA-së në Kosovë, Jeffrey Hovenier me të cilin diskutuan mbi temat me interes nacional për Kosovën dhe partneritetin strategjik të vendit me SHBA-në.
Me theks të veçantë u shtruan temat e proceseve integruese të Kosovës, dialogut, zhvillimin ekonomik e energjetik të Kosovës, qeverisjen e mirë, reformat në drejtësi si dhe partneritetin për mbrojtje e avancimin e FSK-së.
Abdixhiku shprehu qartë qëndrimin e LDK-së se Kosova duhet të marrë përgjegjësitë e saja në avancimin e agjendës euro-atlantike dhe marrjes së vendimeve me interes nacional për vendin.
“LDK do të kujdestarojë relacionet strategjike me SHBA në të gjitha etapat e ardhshme zhvillimore të Kosovës”, tha ai.
Ndërsa ambasadori Hovenier shprehu gatishmërinë dhe vullnetin e administratës amerikane për të mbështetur Kosovën në sfera jetike të vendit.
