Janë vënë në pranga dy persona pasi ne kontejnerin e mishit të mishtores së njohur në Kosovë, “Apetit Group” u kapën 45.5kg kokainë që vinte nga Brazili dhe për destinacion kishte Mqedoninë e Veriut.
Dy të arrestuarit janë administratori i “Apetit Group” Arben Ferizi dhe agjenti doganor në Portin e Durrësit, Egert Vargu.
Veriu.info mëson se i arrestuari Arben Ferizi, është djali i Remzi Ferizit, njërit prej pronarëve të Apetit Group.
Sasia e kokainës vinte tranzit nga Brazili për në Maqedoninë e Veriut, dhe siç njoftohet u kap falë informacioneve që dispononte Policia Kriminale e Drejtorisë Vendore të Policisë Durrës, ndërsa dy të arrestuarit akuzohen për veprën penale “Trafikimi i lëndëve narkotike”.
Kontejneri ku ndodhej lënda narkotike ishte i mbushur me mish pule. Si rezultat i kontrollit të kryer, në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë.
Policia njofton se vijon puna hetimore për identifikimin dhe kapjen e personave të dyshuar që fshihen pas ngarkesës me lëndë narkotike.
Kjo është sasia e dytë e drogës që sekuestrohet nga Policia e Durrësit në port në harkun kohor të një muaji pasi më 17 maj një tjetër ngarkesë prej 59 kg kokainë u kap në një kontejner me qymyr që vinte nga Ekuadori.
