Emisari special i Bashkimit Evropian për dialogun Kosovë-Serbi, Miroslav Lajcak ka takuar sot liderët e opozitës kosovare, për të diskutuar për dialogun dhe situatën në veri.
Në këtë takim morën pjesë lideri i PDK-së, Memli Krasniqi, lideri i LDK’së, Lumir Abdixhiku dhe lideri i AAK’së, Ramush Haradinaj.
Të tre këta liderë u shoqëruan me zyrtarë partiakë.
Krasniqi u shoqërua nga Bedri Hamzën, Abdixhiku nga Lutfi Haziri dhe Haradinaj nga Ardian Gjini.
Lajcak, përmes një cicërime në Twitter e ka përshëndetur mirëkuptimin dhe mbështetjen e opozitës për dialogun, në normalizimin e marrëdhënieve.
“Në Kosovë sot u takova edhe me liderët e opozitës shqiptare të Kosovës për t’i informuar ata mbi Dialogun e lehtësuar nga BE-ja. E përshëndeta mirëkuptimin dhe mbështetjen e tyre për Dialogun në normalizimin e marrëdhënieve, i cili është në interesin kombëtar për Kosovën”, shkroi Lajcak.
Kujtojmë se në dy ditët e fundit, Escobar dhe Lajcak janë duke mbajtur takime edhe me krerët e shtetit Kosovar për normalizimin e marrëdhënieve mes Kosovës dhe Serbinë.
