"Mezi po punoj se po më shohin me atë shikim se unë jam ajo e dyshimta”, thotë Filloreta Kastrati, zyrtare policore, tre muaj pasi u bë subjekt i dhunës së ushtruar nga Senad Hamziç, një rresht i policisë në Pejë.
Kastrati, në orët e hershme të mëngjesit të 14 majit, ishte dhunuar fizikisht nga rreshteri Hamziç, me të cilin ishte në një lidhje dashurie.
Kur kanë kaluar tre muaj nga ngjarja, rreshteri Hamziç po përballet me një aktakuzë nga Prokuroria. Një procedurë penale ndaj tij është iniciuar ndaj tij për “lëndim të rëndë trupor”.
Por, viktima e rreshterit Hamziq pretendon se po i bëhet e padrejtë nga organet e drejtësisë në vend.
Në një rrëfim, Filloreta Kastrati ka treguar ngjarjen e cila tronditi oponionin disa muaj më parë.
Zyrtarja policore thekson se Hamziq ka “lidhje të forta” në organet e rendit dhe ligjit, derisa dyshon se rreshteri nuk do të vuajë “dënimin e merituar” për dhunën e ushtruar ndaj saj.
Kastrati thotë se rreshteri Hamziç e kishte goditur atë me shqelma në fytyrë.
Motivi i ngjarjes ishte xhelozia, pretendon ajo. Po ashtu, ajo përmend dyshimet që Hamziç kishte ngritur ndaj saj për një lidhje me një person tjetër.
“Ka qenë ora një i natës dhe ma ka kërku telefonin dhe të njëra kartelë e kisha numrin e një mjeshtri që më ka ndihmuar shumë; që ma ka lye shtëpinë. Ai ma murrë telefonin dhe e thirri atë personin dhe me ka shti mu me folë, dhe me ka thënë që ti më ke tradhtuar me të. Numrin tem ai personi e njeh, por ai e ka thirr me kartelën e parë dhe nuk i ka dalë numri jem. Në ato momente ka filluar me më godit dhe ia kam kërkuar telefonin…. Më ka shti me zor në makinë dhe më ka dërgu kah rruga e Fidanishtës [në Pejë]. Gjatë rrugës nonstop ja kam frenuar makinën me frenin e dorës, dhe aty një herë më goditi me kokë”, ka rrëfyer ajo.
Kastrati ka treguar se dhuna ka filluar në veturën e rreshterit Senad Hamziç, në rrugën “Papa Klementi”, në Pejë.
“Nonstop me ka sjellë me shqelma në fytyrë, dhe më ka ngreh zhag dhe armën nuk e kam pasur me vete dhe për fat të mirë që nuk e kam marr se në çfarë gjendje kam qenë kish muajt me ardhë deri te ma e keqja”.
Ajo ka treguar se me veturën e Hamziç kanë shkuar të pompa e derivateve “Hib Petrol” në Pejë, ku në hapësirat e tualetit thotë se i ka larguar rrobat e përlyera me gjak.
“Më ka dërgu të pompa, dhe kam hyrë në banjon e femrave dhe e kam heq maicën e gjakosur. Më ka mbajtë deri në ora 04:22, dhe si jam ndarë prej tij kam shkuar në drejtim të Spitalit”.
Mes tjerash ajo ka treguar, se i posedon të gjitha faktet dhe mesazhet pas dhunës së ushtruar nga rreshteri Hamziç.
Filloreta Kastrati, nënë e tre fëmijëve, ka rrëfyer se edhe pas ushtrimit nga Hamziçi, ai ka tentuar të bijë në kontakt me të por që kësaj here përmes një shokut të tij.
Megjithatë, Kastrati ka treguar se tashmë ka vetëm një masë që është ende në fuqi ndaj rreshteri Hamziç.
Ajo ka treguar se deri në fund të shtatorit, është vendosur në fuqi një masë e sigurisë për mosafrimin e Hamziqit në një distancë prej 20 metrave afër saj.
E krejt frika qëndron te Kastrati, pasi që thotë se ka dëgjuar zëra se Hamziç do të rikthehet në punë, derisa kjo po i duket e padrejtë.
Kastrati, tutje ka pohuar se CD-në ku shihet Amziq duke ushtruar dhunë brutale, ndodhet në prokurori, derisa ka thënë se nuk janë marr masat e menjëhershme.
Ndryshe, më 16 maj ishin publikuar pamjet e sulmit fizik të rreshterit policor, Senad Hamziç ndaj Filloreta Kastrati.
Pamjet e shfaqën Hamziçin brenda një veture teksa sulmon fizikisht zyrtaren e Policisë së Kosovës.
Me rastin e publikimit të videos ishte arrestuar rreshteri Hamziç, ku të njëjtit i ishtë caktuar masa e ndalimit për 48 orë. Gjykata ka vendosur masë sigurie ndaj Hamziçit.