Njoftojnë Kurti dhe Haxhiu: Vettingu sot i dorëzohet Kuvendit

Kryeministri Albin Kurti shpreson se kryeministrja e Serbisë, Ana Bërnabiq, gjatë vizitës së saj në Kosovë të hënën nuk do të jep deklarata nxitëse sikurse Petar Petkovit, kryenegociatori i Beogradit për dialogun.

Ai, në një konferencë për media, ka deklaruar se pasi institucionet e vendit kanë bërë thirrje për  vizitë të Besnik Bislimit, zëvendëskryeministrit të Kosovës, dhe Arbërie Nagavcit, ministres së Arsimit, Shkencës, Teknologjisë dhe Inovacionit, për në Luginën e Preshevës, e kanë pranuar edhe kërkesën për vizitë të Bërnabiqit.

“Shpresoj që edhe vizitat e zyrtarëve, pas qarkullimit të lirë të qytetarëve, do t’i kontribuojë lëvizjes së lirë në përgjithësi, pres që Zonja Bërnabiq të mos e vazhdojë avazin e kryenegociatorit nga Beogradi, i cili jepte deklarata përçarëse dhe ndarëse, që kishin për qëllim tensionimin dhe destalizimin.

Kemi nevojë të përqendrohemi tek jeta më e mirë e qytetarëve”,ka thënë Kurti.

Kryeministri Kurti gjatë konferencës së sotme u deklarua edhe rreth aksionit të djeshëm të PSD-së ndaj Hekuran Muratit.

Ai tha se kjo u bë për inati.

“Nëse je kundër kësaj pakoje, mund të ndërmarrësh edhe aksion kundër ministrit të Financave, Punës dhe Transfereve.

Përndryshe, nuk kemi të bëjmë as me kritika as me kundërshtim, veçse me inati. Pra mund të jesh kundër kësaj pakoje, ose mund të jesh i udhëhequr nga inati. Secila më keq se tjetra”, tha ai.

Ministrja e Drejtësisë, Albulena Haxhiu, ka bërë të ditur se sot në Kuvend do dorëzohet projektligji për Vettingun, duke kritikuar gjyqtarët dhe prokurorët për “neglizhencë, mosveprim dhe pandëshkueshmëri”.

“Po e dorëzojmë në Kuvend një proces me peshë të madhe për ne si qeveri, për shtetin, por më së shumti për qytetarët. Në vazhdimësi jemi dëshmitarë të neglizhencës, mosveprimit dhe pandëshkueshmërisë”, tha Haxhiu.

“Gjyqtarët dhe prokurorët konsiderohen se kanë pagat më të larta në rajon, por, për shkak të mosveprimeve apo veprimeve të tyre të gabuara, po humbim jetë grash, po dhunohen seksualisht të miturit, po dhunohen fizikisht gratë dhe vajzat, dhe korrupsioni i madh mbetet i pandëshkuar”, u shpreh ajo.

Ministrja tha se reforma në drejtësi mundëson që në sistemin e drejtësisë të jenë vetëm ata që kanë integritet të lartë moral dhe profesional dhe që pasurinë e tyre mund ta justifikojnë.

Për rastin e 11-vjeçares, Haxhiu tha se presin edhe dorëheqje të tjera, pasi ka edhe zyrtarë tjerë që nuk i kanë kryer detyrat siç duhet.

“Ka pasur dy dorëheqje, dhe urojmë që të ketë edhe të tjera, pasi siç e  kuptojmë, ka edhe zyrtarë tjerë që nuk i kanë kryer detyrat siç duhet. Kam kërkuar dorëheqjen e Kryeprokurorit të Prokurorisë Themelore në Prishtinë. Po të vepronte prokuoria me kohë, ata persona do arrestoheshim shumë më herët”, tha Haxhiu.

“Duhet të merren veprime ndaj prokurorëve dhe gjyqtarëve që nuk kanë kryer detyrat e tyre”, përfundoi ajo.

Kryeministri i Kosovës, Albin Kurti, ka bërë të ditur se Dokumentin për Vettingun do ta dërgojnë sot në Kuvendin e Kosovës.

Ai, në një konferencë për media, ka deklaruar se janë duke e vazhduar punën e tyre në aspektin e reformës së drejtësisë.

“Puna e nisur nuk mund të mbarojë pa Vettingun dhe sigurimin që institucionet e parandalojnë krimin, gjykatat japin dënimet e merituara, burgjet rehabilitojnë të dënuarit, kurse qytetarët kthejnë besimin në rendin dhe ligjin, e ndjehen të sigurt, e që për detyrë e ka shteti”.

“Për këtë mbetemi të përkushtuar, pas konferencës do të shkojmë për takim me kryetarin e Kuvendit të Kosovës, të cilit do t’ia dorëzojmë edhe dokumentin përkatës, meqenëse nga qeveria, tani deputetët e marrin në duart e tyre procedimin e mëtutjeshëm të Vettingut”, ka thënë Kurti.

Kryeministri i Kosovës, Albin Kurti, bashkë me ministren e Drejtësisë, Albulena Haxhiu, po mbajnë konferencë për media.

Kjo konferencë vjen një ditë pasi ministrja e Drejtësisë, Albulena Haxhiu kërkoi dorëheqjen e kryeprokurorit të Prokurorisë Themelore në Prishtinë.

Kërkesa e saj pason arrestimin edhe të gjashtë personave të tjerë për rastin e 11-vjeçares, të cilët dyshohen se e trafikuan atë gjatë muajit qershor.