Në Ministrinë e Mbrojtjes dhe Forcën e Sigurisë së Kosovës ka përfunduar sot aksioni tradicional humanitar i dhurimit vullnetar të gjakut, për të dytën herë gjatë këtij viti.
Me qëllim të dhënies së ndihmës për Qendrën Kombëtare të Transfuzionit të Gjakut dhe të gjithë qytetarëve të Republikës së Kosovës, ftesës për dhënie vullnetare të gjakut, krahas zyrtarëve dhe ushtarakëve, i janë përgjigjur edhe zëvendësministri i Mbrojtjes, Shemsi Syla si dhe këshilltari amerikan i Ministrit Mehaj, Thomas Niblock.
Përgjatë dy javëve, rreth një mijë ushtarakë të FSK-së, nga të gjitha kazermat dhe zyrtarë të Ministrisë së Mbrojtjes kanë dhuruar gjak.
Aksioni për dhurimin vullnetar të gjakut është organizuar duke u bazuar në planin operacional 2022, në koordinim me Qendrën e Mjekësisë së Forcës së Sigurisë së Kosovës dhe Qendrës Kombëtare të Kosovës për Transfuzion të Gjakut (QKKTGJ).
Përveç aksioneve të rregullta vjetore për dhurimin vullnetar të gjakut, zyrtarët dhe ushtarakët e MM-së dhe FSK-së vazhdimisht i përgjigjen kërkesave për dhënie të gjakut, si nga qytetarët ashtu edhe nga institucionet tona shëndetësore.
