Diplomati gjerman Wolfgang Ishinger ka deklaruar se modeli i “dy Gjermanive” që u propozua në vitin 2007 si zgjidhje për Kosovën dhe Serbinë edhe më tutje mund të shërbej si urë deri tek zgjidhja, këtë ai e publikoi në Tviter, shkruan “Kosovo-online”, transmeton “Bota Sot”.
Publikimi i kësaj “cicërime” në Tviter erdhi si përgjigje ndaj ish-ministrit të jashtëm të Kosovës Petrit Selimi i cili po ashtu në Tviter komentoi “kuadrin e ri” të dialogut që kinse kanë propozuar Gjermania dhe Franca dhe që dje qarkulloi ne medie.
Sipas atij plani, Serbia në dhjetë vitet e ardhshme nuk do të njihte formalisht pavarësinë e Kosovës, por duhet të pranoj Kosovën si realitet juridik edhe politik.
"Në fund të vitit 2007, ne treshja e Kosovës, pothuajse ia dolëm të arrijmë sukses me modelin e ‘dy Gjermanive’ që e kam propozuar. Ai edhe më tutje mund të siguroj urën drejt zgjidhjes në drejtimin e duhur”, tha Ishinger.
Diplomati gjerman Ishinger ishte përfaqësues i BE-së në treshen e bisedimeve, ku veç tij përfaqësues i Rusisë ishte ambasadori aktual në Serbi Aleksandar Bocan Harçenko, ndërsa përfaqësues i palës amerikane ishte Frenk Vizner.
