Ministri i Punëve të Brendshme, Xhelal Sveçla e ka rikthyer në punë Fadil Kodrën, drejtorin e Agjencisë për Menaxhimin e Emergjencave, të cilin e kishte shkarkuar nga pozita dy muaj më parë.
Vendimin për rikthimin në punë të Kodrës, ministri Sveçla e ka nënshkruar sot.
Bazuar në vendimin e Sveçlës, Kodra do të rikthehet në punë nga nesër si dhe atij do t’i kompensohet paga për dy muajt e largimit nga puna.
Kodra, i shkarkuar më 14 korrik nga pozita e drejtorit të Agjencisë për Menaxhimin e Emergjencave (AME), kishte ushtruar kallëzim penal ndaj ministrit të Punëve të Brendshme për “cenim të të drejtave në marrëdhëniet e punës” dhe “keqpërdorim të pozitës apo autoritetit zyrtar”.
Sipas kallëzimit penal të dorëzuar në Prokurori, Sveçla kishte shfuqizuar vendimin e gabuar në rastin e shkarkimit të Kodrës nga pozita e drejtorit të AME-së.
Siç kishte raportuar Paparaci më 15 korrik, ministri Sveçla kishte shfuqizuar një vendim të vitit 2015 të ish-ministrit Skender Hyseni, por kishte anashkaluar një vendim të ish-kryeministrit Ramush Haradinaj për emërimin e Kodrës në krye të AME-së.
Bazuar në kallëzimin penal ndaj ministrit Sveçla, dëmi që e kishte shkaktuar MPB-ja ndaj Fadil Kodrës tejkalon shumën e 5 mijë eurove dhe thotë se ajo që ka bërë ministri i rendit është e dënueshme me gjobë dhe burgim prej 3 deri në 10 vjet burgim.
