Deputeti i LDK-së, Armend Zemaj ka folur për grevën në arsim, ku tha se do të kishte dashur që të mos ketë greva fare dhe fëmijët ta vijojnë mësimin e rregullt.
Zemaj ka thënë se mësimdhënësit duhet ta kenë atë shtesën e dinjitetshme deri në miratimin e Ligjit të Pagave.
“Unë kisha dëshiruar që të mos ketë greva fare që fëmijët ta vijojnë mësimin e rregullt, që mësimdhënësit ta kenë atë shtesën e dinjitetshme deri në miratimin e ligjit të ri të pagave”, ka deklaruar ai.
Po ashtu, Zemaj thotë se Qeveria nuk mund t’i mashtrojë mësimdhënësit se do të vij Ligji i Pagave e të deklarojë koeficientet, por në anën tjetër nuk e thotë cila është vlera e koeficientit. Sipas tij, ky është mashtrim optik.
“Por edhe ata dëshirojnë një premtim i cili është serioz por mbi të gjitha që është garanci, nuk mundesh t’i mashtrosh se do të vijë ligji i pagave, me qit atje nëpër tema e debate që këta janë koeficientet dhe në anën tjetër nuk e deklaron cila është vlera e koeficientit. Prapë ky është një lloj mashtrimi optik që pretendohet të gjuhet në shoqërinë”, theksoi ai.
