Deputeti i Vetëvendosjes, Armend Muja thotë se kërkesa për zbatimin e Asociacionit të Komunave me shumicë serbe në Kosovë është kërkesë e presidentit të Serbisë, Aleksandar Vuçiq dhe e drejtorit të së ashtuquajtures "Zyrë për Kosovën" në Qeverinë serbe, Petar Petkoviqit.
Muja theksoi se nuk ka dëgjuar ndonjëherë që kjo kërkesë është bërë nga serbët lokalë.
“Hera e parë që po dëgjoj prej serbëve lokalë, se zakonisht kërkesën për Asociacionin, me thënë të drejtën çdo takim që kemi pasur edhe jashtë vendit, nuk është që të paktën na e ka thënë dikush, kanë qenë momente kyçe kur këto gjëra diskutohen, ta zëmë është dialogu i struktruar me BE-në që bëhet, personalisht nuk i kam dëgjuar unë ndonjëherë…kërkesën është duke e bërë Vuçiqi dhe Petkoviqi”, tha ai.
Formimi i Asociacionit është përfshirë në kuadër të Marrëveshjes së parë të nënshkruar mes Kosovës dhe Serbisë më 2013, në dialogun e ndërmjetësuar nga Bashkimi Evropian. Sa i përket kësaj çështjeje, kryeministri Albin Kurti, vazhdimisht ka deklaruar se nuk do ta pranojë themelimin, meqë sipas tij ky asociacion është një etnik.
