Zëvendëskryeministri Besnik Bislimi do të shkojë nesër në Beograd të Serbisë.
Rrjedhimisht, ai është bërë një prej zyrtarëve më të lartë të shtetit të Kosovës, që e ka vizituar kryeqytetin serb që nga përfundimi i luftës së fundit.
Zëvendësi i Kurtit të enjten do të jetë prezent në konferencën e Forumit për Marrëdhënie Etnike, në tryezën e diskutimit “Dialogu Diplomatik”, me temë “Kosova dhe Perspektiva Evropiane e Rajonit”, me fillim nga ora 17:00.
Përveç kësaj, ditën e premte, Bislimi do të jetë pjesëmarrës në një panel diskutimi, në kuadër të “Belgrade Security Conference”, me temë “Kosova dhe Serbia – Shmangia e rrugës pa dalje”, me fillim nga ora 18:15.
E për këtë çështje ka reaguar deputetja e PDK-së, Ariana Musliu-Shoshi.
“Lëre se po ulen në tavolinë me Serbinë po edhe në Beograd po shkojnë. #prioritetet #dialogu7”, shkroi ajo në Facebook.
