Kryetari i Lidhjes Demokratike të Kosovës, Lumir Abdixhiku, ka thënë se brenda kësaj dekade është i mundshëm anëtarësimi i Kosovës në aleancën e NATO-s.
I ftuar në Rubikon, ai ka theksuar se anëtarësimi në NATO do të ishte arritja më e madhe e Kosovës pas shpalljes së pavarësisë së saj.
“Ne duhet të kërkojmë me këmbëngulje që ta përfundojmë këtë normalizim me Serbinë, të marrim njohjen e pesë vendeve evropiane, sepse kjo ia hapë dyert Kosovës, nuk po flas për BE apo OKB, po flas vetëm për anëtarësimin në aleancën e NATO-s dhe më pas ne t’i kthehemi çështjeve tona të brendshme”.
“Unë besoj se brenda dekadës së tanishme, me politika të guximshme dhe përparimtare sa i përket aspiratave politike të Kosovës – brenda kësaj dekade, Kosova në NATO është e mundshme”.
“Por, për këtë, na duhet lidership i vërtetë që nuk merret me të kaluarën, që nuk bën kriza, që nuk mbulon këto kriza me skandale të ndryshme dhe që nuk e ka në qafë tërë komunitetin ndërkombëtar, por ulet me aleatët e saj dhe e kupton natyrën e shtetndërtimit”.
“Anëtarësimi në NATO, do të ishte arritja më e madhe historike pas shpalljes së pavarësisë, do të ishte siguri, kufi strategjik i qëndrueshëm përtej çdo matjeje”.
