“Lista Serbe nuk e ka bërë asnjë kërkesë për projekte që ruajnë ose avancojnë interesat e serbëve”, ka thënë zv/kryeministri Besnik Bislimi gjatë një diskutimi në Zyrën e BE’së në Prishtinë me temën “Raporti i Zgjerimit dhe çfarë ka në të për Kosovën”.
Për zgjedhjet e caktuara më 18 dhjetor në katër komunat veriore, ku s’do të marrin pjesë Lista Serbe – subjekt ky i cili mban mazhorancën e elektoratit në ato zona – Bislimi tha se janë “mundësi e artë që serbët të zgjedhin mekanizma që përnjëmend promovojnë interesat e komunitetit” dhe jo, sipas tij, “ato të klaneve të caktuara të politikbërjes së Beogradit”.
Bislimi, siç raporton media serbe me seli në Graçanicë “KoSSev”, “iu shmang përgjigjes specifike” se a ka qeveria zgjidhje për krizën aktuale në pjesën veriore dhe nëse ka ndonjë marrëveshje për çështjen e riregjistrimit të veturave.
“Ne jemi të shqetësuar për një shumësi gjërash më të vogla, dhe jo këtë”, ka thënë zv/kryeministri. “Duhet të bëjmë dallim në mes të asaj se a jemi të shqetësuar për diçka dhe a po shpresojmë për diçka. Shpresojmë se diçka do të ndodh”.
Bislimi në lidhje me Listën Serbe, nuk ishte pa kritika.
“Lista Serbe ka qenë me vite pjesë e institucioneve. Kam qenë dhe jam ende zëvendëskryeministër, por kam pasur zero takime me zotin Rakiç, zerko kërkesa nga ai për projekte që ruajnë dhe çojnë përpara interesat [e komunitetit serb] dhe zero iniciativa nga Lista Serbe në Kuvend”.
“Mendoj se kjo është mundësi e artë që ju të zgjidhni mekanizmat që njëmend promovojnë interesat e komunitetit, dhe jo interesat e disa klaneve të caktuara e të politikbërësve të Beogradit”, ka thënë Bislimi.
