Nënkryetari i Lidhjes Demokratike të Kosovës, Lutfi Haziri, ka thënë se Shtetet e Bashkuara të Amerikës do t’i ruajnë përjetësisht marrëdhëniet me popullin e Kosovës.
Sipas tij, ShBA-të do t’i dëmtojnë raportet me funksionarët kur e humbin udhën.
Haiziri ka thënë se “këshilla” e ShBA-së për disa prej ministrave kosovarë për të mos udhëtuar drejt Amerikës është një lloj sanksionimi.
“ShBA i tashmë i ka dhënë shenjat e parë të rivlerësimit të raporteve me funksionarët e Kosovës. ‘Këshilla’ e mikut më të madh të shqiptarëve të Kosovës për të mos udhëtuar, është lloj sanksionimi. Kjo është fatale dhe alarmante”.
Kujtojmë se zyrtarë kosovarë nga opozita po qëndrojnë në Shtetet e Bashkuara të Amerikës. Aktualisht, atje për takime ndodhet kreu i Lidhjes Demokratike të Kosovës, Lumir Abdixhiku dhe kryetari i Partisë Demokratike të Kosovës Memli Krasniqi.
Drejt Shteteve të Bashkuara të Amerikës s’kanë mundur të udhëtojnë tre ministrat e Qeverisë Kurti, Albulena Haxhiu, Xhelal Sveçla dhe Elbert Krasniqi. Për këtë çështje ka folur ambasadori amerikan, Jeff Hovenier, duke konfirmuar se ka qenë sugjerim i Ambasadës që të njëjtit të mos udhëtojnë drejt SHBA-së shkaku i krizës për targat.
