Projektligji për lejimin e tërheqjes së 30% të mjeteve nga Trusti Pensional, pa mendim të Qeverisë iu është dërguar deputetëve të Kuvendit të Kosovës për ta shqyrtuar para se të hidhet në votim.
E ky projektligj para se të shkon në seancë, duhet që të diskutohet në komisionin për Buxhet, Punë dhe Transfere.
Data se kur do të diskutohet nuk dihet ende.
Këtë informacion nuk e ka as anëtarja e këtij Komisioni nga pozita, deputetja e Listës “Guxo”, Jeta Statovci.
“Projektligji për tërheqjen e mjeteve nga Trusti Pensional, ende nuk është trajtuar nga Komisioni për Buxhet dhe Financa”, deklaroi ajo.
Ndërsa e pyetur se si do të votojnë deputetët e Listës Guxo, ajo tha se qëndrimin do ta bëjnë të ditur kur ai të shkon në komision.
“Në momentin që i njëjti vjen në rend dite, qëndrimi padyshim se do të bëhet i ditur për ju dhe opinionin”, u shpreh ajo.
Deputetja Statovci foli edhe për humbjet që ka pasur Trusti në 9 muajt e fundit.
Ajo tha se kjo humbje vie nga luhatjet/performanca e tregjeve ndërkombëtare, dhe jo humbje në kuptimin klasik.
“Ndërsa për ‘humbjet’ nga ana e Trustit, janë cikle të ekonomisë që varen nga luhatjet/performanca e tregjeve ndërkombëtare, dhe jo humbje në kuptimin klasik. Sipas deklaratave të tyre (Trust-it), vetëm një muaj më pas, kishin rikthim të afër 90 milionë euro e nga totali paraprak”, tha Statovci.
