Kryeministri i Kosovës, Albin Kurti, ka takuar në Madrid ish–Sekretarin e Përgjithshëm të NATO-s, Javier Solana.
Sipas komunikatës së Qeverisë, Kurti i ka shprehur mirënjohje Solanës për rolin në çlirimin dhe pavarësimin e Kosovës.
Në takimin që është zhvilluar në muzeun kombëtar Museo Nacional del Prado, u bisedua mbi gjendjen e Kosovës, të rajonit, por edhe të Evropës, përballë luftës ruse në Ukrainë.
“Kryeministri Kurti shprehu mirënjohjen për rolin e z.Solana gjatë dy momenteve përcaktuese për popullin tonë: çlirimin tonë në vitin 1999, si dhe shpalljen e pavarësisë në vitin 2008. Përvoja e z.Solana, si ish-Sekretar i Përgjithshëm i NATO-s dhe ish-Përfaqësues i Lartë i Politikës së Jashtme dhe të Sigurisë të BE-së është e çmueshme për Republikën e Kosovës dhe e paharrueshme për popullin e Kosovës”, thuhet në komunikatën e Qeverisë.
Kryeministri Kurti të premten ka udhëtuar për në Spanjë, ku po merr pjesë në Kongresin e Internacionales Socialiste, që mbahet në Madrid.
