Deputeti i Lëvizjes Vetëvendosje, Adnan Rrustemi ka folur rreth vendimit për ndryshimin e masës së arrestit ndaj ish-policit serb Dejan Pantiq të arrestuar nën dyshimet për organizim të sulmeve në zyrat e KQZ-së në veri të vendit.
Rrustemi, ka thënë se nuk ka asnjë dilemë se përse ai është i habitur për vendimin e drejtësisë, nëse i referohemi peshës së veprës penale dhe rreziqeve që mund të ndikoj ky vendim duke theksuar; ndikimin tek dëshmitarët, asgjësimin e provave, arratisjen etj.
“S ka asnjë dilemë që unë jam i habitur me vendimin e gjyqtarit të rastit duke pasur parasysh peshën e veprës penale për të cilën dyshohet, si terrorizëm, sulm ndaj rendit kushtetues, sulm ndaj pronës publike e në rastin konkret të zyrave të KQZ-së në veri. Por kur e sheh kodin e procedurës penale ku masa e paraburgimit është masë e cila vjen si rrjedhojë e vlerësimit të rrethanave ku i dyshuar për veprën penale ka rrezik që të arratiset, të ndikojë tek dëshmitarët t’i asgjësoj provat, pra kur i sheh këto habitesh me vendimin. E lexova edhe vendimin e gjyqtarit të procedurës paraprake edhe arsyetimi i vendimit por edhe i prokurorit më shumë janë fakte për të mos i shqiptuar masën e arrestit shtëpiak por për ta mbajtur në paraburgim, sido që të jetë në raport politik është e rëndësishme të përmendet se hetimet po vazhdojnë.”, ka thënë Rrustemi.
Tutje Rrusrtemi ka komentuar edhe pengesat për ta sjellur në ndonjërën nga qendrat e paraburgimit të burgosurin Pantiq.
“Ka pasur pengesa, ne kemi qenë të interesuar për ta sjellë në paraburgim, një kërkesë e tillë i është bërë edhe EULEX-it, por kjo nuk do duhej të ishte arsyetim për të nxjerrë një vendim të tillë.”, deklaroi Rrustemi.
