Ministrja e Drejtësisë, Albulena Haxhiu u bë pjesë e Lëvizjes Vetëvendosje në vitin 2010, ku u zgjodh menjëherë deputete e Kuvendit të Republikës së Kosovës.
Haxhiu ishte e ftuar të premten në emisionin “LIBERO” dhe diskutoi shumëçka për sa i takon aktivitetit të saj politik.
Meqenëse ajo mori besimin dhe mbështetjen e qytetarëve disa herë për t’u bërë deputete, në pyetjen se çfarë konsideron si armën më të fortë dhe pse mendon se e votuan qytetarët, ajo befasoi me përgjigjen.
“…Hera e parë që kam qenë në listën e Lëvizjes Vetëvendosje ka qenë në 2010… Nuk mund të them se në mandatin e parë më kanë votuar sepse më kanë njohur dhe besuar, sepse nuk është e vërtetë… Ka pasur disa që më kanë njohur, por që unë mendoj se arsyeja kryesore është sepse Vetëvendosje e ka bërë listën në mënyrë alfabetike dhe A-ja ishte në fillim…”, deklaroi Haxhiu.
Më pas, ajo shtoi se është angazhuar shumë për ta ruajtur besimin dhe mbështetjen e qytetarëve.
“…E kam marrë shumë seriozisht, sepse ka pasur edhe deputetë tjerë të cilët kanë qenë në mandatet e tyre njëherë, por nuk kanë arritur të zgjedhen… Ky është vendimi i popullit… Jam përpjekur maksimalisht që ta përmbushë mandatin tim, të jem aktive dhe t’i përfaqësojë dinjitetshëm interesat e qytetarëve, pastaj konsideroj se në mandatet tjera më kanë besuar, më kanë njohur, prandaj edhe më kanë votuar…”, theksoi ajo.
Kujtojmë se me formimin e Qeverisë Kurti në shkurt të vitit 2020, Haxhiu është emëruar si ministre në Ministrinë e Drejtësisë, të cilën e ka udhëhequr deri në qershor të po atij viti.
Pas një viti, kur Lëvizja Vetëvendosje u rikthye në pushtet, Haxhiu mori sërish në drejtim pozitën e ministres së Drejtësisë.