15 vjet shtet - FSK dhe Policia parakalojnë shesheve të kryeqytetit

Kryeministri i Kosovës, Albin Kurti ka thënë se në sheshet e Prishtinës ku parakalojnë ushtarët e FSK-së, në të kaluarën kanë parakaluar protestuesit. Sipas Kurtit, sot Kosova qëndron më mirë dhe se për këtë është dashur shumë punë.

“Këto rrugë që do të parakalojnë forcat tona, janë rrugë që dikur parakalonin protestuesit. Është dashur shumë mund dhe shumë punë që të vije kjo ditë. Në këtë ditë të shenjtë kujtojmë Demaçin, Rugovën dhe Jasharajt. Vendi ynë ka kaluar shume sfida muajt e fundit, por policia e Kosovës ka treguar profesionalizëm të lartë. 

Teksa në sfond ndryshon gjendja globale e sigurisë, FSK punon çdo ditë që ta ndjek këtë ritëm”, tha Kurti, teksa përmendi edhe shtimin e buxhetit për FSK dhe të ushtarëve në këtë Forcë.

“Sivjet kemi edhe 612 ushtarë të rinj. Buxheti për mbrojtje është rritur vitin e kaluar për 52 për qind e sivjet e kemi rritur edhe 20 për qind.

Ashtu si ditën kur u shpall pavarësia, edhe sot, edhe nesër, Kosova është shtëpia e të gjithë qytetarëve, pa dallime etniteti e religjioni”, tha Kurti.

Presidentja e Kosovës, Vjosa Osmani, i ka quajtur pasardhës të Ushtrisë Çlirimtare të Kosovës ushtarët FSK-së dhe Policisë së Kosovës. Në parakalimin e Trupave të Forcës të Sigurisë së Kosovës dhe Policisë së Kosovës, Osmani ka thënë se Kosova është e shenjtë dhe si e tillë duhet të ruhet.

Presidentja Osmani ka thënë se periudha nëpër të cilën po kalon Kosova ka shumë sfida, shkaku i krizave globale.

“Vajzat dhe djemtë e policisë sonë do të parakalojnë edhe në sheshin e Ibrahim Rugovës, i cili po na shikon nga lart dhe është shumë krenar. Këta vajza e djem janë pasardhësit e UÇK-së që e mbrojtën dhe e formuan shtetin tonë. Një falënderim shumë i madh shkon edhe për miqtë tanë. Faleminderit ShBA-së, aleatit tonë të përjetshëm. Faleminderit të gjitha shteteve të NATO-s dhe shteteve tjera mike të Kosovës”, ka thënë Osmani

“Vetëm kur jemi bashkë jemi të suksesshëm. Republika jonë është e shenjtë dhe ne duhet ta ruajmë ë e trajtojmë si të tillë”, ka theksuar Osmani.

Ajo ka theksuar se Republika e Kosovës mban vulën e sakrificës së 3 mijë dëshmoreve të Ushtrisë Çlirimtare të Kosovës që u udhëhoqën nga komandanti Adem Jashari. “Liria, Pavarësia dhe shteti ynë, janë testamenti i tij dhe i shumë brezave, ndaj përulemi me respekt para tyre”, ka thënë Osmani.

Sipas saj, kuadratet e ushtrisë dhe të Policisë, janë pjesa më e ndritshme e historisë së re Kosovës.

“Sikurse ushtria jonë që dëshmohet e na bën krenar çdo herë, edhe Policia e Kosovës, e cila së fundi u përballë me angazhim të shtuar nga zhvillimet në veri të vendit, ka treguar përkushtim dhe vendosmëri për ta ruajtur rendin dhe ligjin, por mbi të gjitha për ta ruajtur sovranitetin ne çdo cep të Republikës së Kosovës”, është shprehur Osmani, duke thënë se ata janë pasardhës të UÇK-së.

Ajo ka folur edhe për rëndësinë e emrave të personave që mbajnë sheshet nëpër të cilat ka parakaluar ushtria e Policia.

“Jo rastësisht trupat e ushtrisë sonë do të parakalojnë në tri sheshe emblematike, të cilat përmbledhin dhe gërshetojnë, një pjesë të madhe të historisë tonë. Do të fillojnë nga sheshi ‘Ibrahim Rugova’, do të vazhdojnë nëpër sheshin ‘Nëna Terezë’ e do të kthehen këtu, tek sheshi ‘Zahir Pajaziti’, e pas nderimit ndaj 15-vjetorit të Pavarësisë së shtetit kuadratet e tyre do të kthehen në kazermën e cila man emrin e ikonës së luftës sonë çlirimtare, komandantit tonë legjendar “Adem Jashari”, ka theksuar Osmani.

Forcat e Sigurisë së Kosovës dhe të Policisë së Kosovës kanë parakaluar në sheshet kryesore të kryeqytetit, me rastin e 15-vjetorit të shpalljes së pavarësisë së Republikës së Kosovës.

Qytetarë të shumtë nga të gjitha viset shqiptare kanë parë nga afër parakalimet e pjesëtarëve të këtyre dy institucioneve të rendit dhe sigurisë.

Ata janë shprehur krenar me FSK-në dhe Policinë.

Ata kërkojnë që ky ritëm i zhvillimit të tyre të mos ndalet.