Jo vetëm në Kosovë e Serbi, por edhe në vendet e rajonit po parashikohen rezultatet e takimit të 27 shkurtit në Bruksel, mes kryeministrit Albin Kurti dhe presidentit serb, Aleksandar Vuçiq.
Publicisti nga Shqipëria Fatos Lubonja në një prononcim thotë se marrëveshja po tentohet të arrihet nga nevojat e jashtme të gjeopolitikës, dhe jo nga nevojat e palëve në dialog.
“E para gjë që dua të them është se unë e kuptoj këtë marrëveshje në kontekstin e gjithë problematikave që ka hapur lufta në Ukrainë, pra dy aktorët e Ballkanit, pra Kosova dhe Serbia, thërriten që të bëjnë këtë lloj marrëveshje në mënyrë që të evitohen si të thuash probleme tjera nga ana e perëndimit që mund t’i bashkohen luftës në Ukrainë e gjithë problemeve që ajo ka hapur. Në këtë kontekst mendoj që shpesh herë kështu janë marrë vendimet, nuk jam nga ata që jam shumë entuziast për një vendim që merret në këtë mënyrë nga një nevojë tjetër e jashtme, jo e brendshme e shqiptarëve e serbëve për të ndërtuar vërtetë një Ballkan paqësorë”, tha Lubonja.
Profesori universitar nga Maqedonia e Veriut, Bashkim Selmani, thotë se takimi është pozitiv edhe pse palët do t’i nënshtrohen zgjidhjeve të dhimbshme.
“Vet takimi ka karakter pozitiv në aspektin e bisedimeve dhe e dyta nëse merret esenca mes palëve unë nuk shoh se të dy palët në këtë rast në këtë kontekst kanë disponim për t’i zgjidhur problemet, mirëpo është faktori ndërkombëtar ai i cili ka arritur që pas situatave dhe trazirave që ishin në Republikën e Kosovës në këtë rast presioni është shumë më i lartë i shtuar nga të dy palët dhe ofrimi që i është ofruar të dy palëve, nuk janë bërë aq publike për të kapur ne në thellësi detajet e një marrëveshje. Mirëpo unë kam bindjen se në këto rrethana në bazë të kontekstit diplomatik dhe ndërkombëtarë, janë parakushtet për të cilat palët mund të bijën ujdi për të nënshkruar momentet të cilat janë në interesin e kompromisit edhe pse në bazë të gjithë analizave shihet se kjo është një marrëveshje shumë gjenerale shumë e thellë dhe parashihet që të jetë për të dy palët e dhimbshme”, deklaroi Selmani.
Përfaqësuesit Evropian Josep Borrell dhe Mirosllav Lajcak, kanë kërkuar nga Kurti e Vuciq, që më 27 shkurt të pranojnë edhe zyrtarisht planin franko-gjerman. Pas nënshkrimit eventual të tij, palët marrin edhe zotimet për fillimin e zbatimit të planit të veprimit.
