Ministri i Financave, Hekuran Murati ka deklaruar se opozita aktuale dikur kishte thënë se Serbia nuk njeh Kosovën pa i dhënë diçka. Në seancën e natës për dialogun, ai shtoi se të njëjtit e kanë sjellë vendin në humnerë.
Për takimin e së hënës të nivelit të lartë në Bruksel, Murati tha se kjo marrëveshje është një hap tutje dhe shumë e rëndësishme drejt epilogut të mirë me Serbinë.
Murati: Edhe vet ju jeni të vetëdijshëm që në çfarë humnere e keni sjellë vendin
“Në javët që i prinin 27 shkurtit, apo të hënës, kanë qenë shumë të ngazëllyer, sepse e kanë ditur çka kanë lënë dhe sipas tyre aq keq e kanë lënë punën, sipas deputetëve të opozitës, ju që keni qenë në qeveri, sa që sipas mendimit tuaj kanë qenë vetëm dy mënyra. E para, ose me sharru prapë në humnerën që e keni shti Kosovën ju, ose me i thënë jo një marrëveshjeje potenciale edhe pastaj me ardh me sha këtu ‘ju kundër aleatëve, kundër Amerikën’. Edhe vet ju jeni të vetëdijshëm sa keq e keni lënë situatën dhe në çfarë humnere e keni sjellë vendin”, ka thënë Murati.
Ai tha se diskutimet e deputetëve janë keqinterpretime edhe nxjerrje e fjalëve jashtë kontekstit.
Murati: Ju keni krijuar Listën Serbe që komunikon direkt me Beogradin
“Diçka që u fol këtu, disa deputetë thanë që ‘komunikimi i komunitetit serb direkt në qeverinë, problem i madh’. Tash, ju keni krijuar Listën Serbe që komunikon direkt me Beogradin, me Qeverinë e Serbisë, këtë po e llogaritni të keqe, ajo për juve ka qenë në rregull. Ta bëni Listën Serbe të komunikojë direkt me Vuçiqin, për ju ka qenë në rregull. Kur e keni çuar dorën dhe e keni votuar”, shtoi ai.
Murati tha se është hera e parë që të dy palët kanë reciprocitet, duke shtuar se opozita e dikurshme kishte thënë se njohja e Serbisë nuk vjen pa i dhënë diçka.
Murati: A jeni ju që thoshit që duhet me i dhënë diçka Serbisë që të na njoh?
“’Overcoming the past’ i bije që Serbia, njësoj sikur nazizmi duhet të ballafaqohet me të kaluarën, në mënyrë që të tejkalojë. Më në fund e kemi një situatë ku Serbia vihet para ballafaqimit me të kaluarën e vet. Çfarë keni bërë ju? Keni bërë Gjykatë Speciale që e gjykon luftën e UÇK-së. U tha prej kryetarit të PDK-së çka na duhet njohja nga Serbia, mundemi pa të. More a jeni ju që thoshit duhet me i dhënë diçka Serbisë që të na njoh? Ju keni qenë edhe ju keni qenë në koalicion, thoshit duhet Serbisë me i dhënë diçka që ajo të na njoh, përndryshe çfarë interesi ka Serbia të na njoh nëse nuk i japim asgjë”, u shpreh ai.
Murati ka komentuar edhe akuzat e opozitës për lejimin e financimit të komunave nga Serbia.
Murati: Ligji është në fuqi, e keni votuar ju në vitin 2008
“Për rifreskim të kujtesës, disa që jeni më të rinj ndoshta edhe nuk e dini, por ka edhe deputetë të tillë që kanë votuar këtë ligj dhe janë në kuvend, neni 7 i Ligjit për Financat e Pushtetit Lokal thotë si vijon: Burimet financiare të një komune përbëhen nga të hyrat vetanake, grantet sipas kompetencave të shtuara, transfereve për kompetencat e deleguara, grantet e jashtëzakonshme dhe pika e 6 thotë ndihma financiare nga Republika e Serbisë. Ky është ligj që është në fuqi, e keni votuar ju në vitin 2008”, ka deklaruar Murati.
