Kryetari i Punonjësve të Sektorit Privat në Kosovë, Jusuf Azemi, ka thënë se nuk ka marrë mbështetje prej Komunës së Prishtinës për pagesën e punonjësve teknikë të shkollave për muajin shkurt dhe mars 2023.
Pas takimit me shefin e kabinetit të kryetarit dhe drejtoreshën e Arsimit në kryeqytet, Besianë Musmurati, Azemi ka thënë se nuk e mori përkrahjen që këta punëtorë të paguhen, pasi Komuna nuk gjen bazë ligjore.
“Një takim i cili kemi pritur më shumë se sa që na është ofruar, realisht ata mbetën në pozicionet e tyre që nuk kanë mbështetje ligjore për pagesën e muajit shkurt dhe për muajin mars. Aq punë më keq se të gjithë punëtorët të cilët janë vetëm të kompanisë dhe nuk kanë pasur ndonjë dokument zyrtar të komunës kanë marrë një obligim, që ne po themi prapë nuk na kënaqi”, tha Azemi.
Mirëpo Azemi tha se shpreson që pas ardhjes së operatorit të ri, këta punëtorë do të kthehen në vendet e punës.
“Kanë marrë një obligim që në momentin kur vjen operatori I ri, a vjen pas 10 dite apo pas 2 javë dite, drejtoria e Arsimit, shefi I kabinetit dhe unë do ta thërrasim pronarin ose operatorin e ri dhe të gjithë punëtorët që kanë qenë duke punuar në vendin e tyre të punës t’i kthejnë, përndryshe javën ardhshme të gjithë punëtorët që kanë qenë më herët dhe pastaj janë privatizuar ata do të kthehen menjëherë në menaxhimin e komunës së Prishtinës po megjithatë të themi shumë sinqerisht ne për shkak të neglizhencës së procedurave të komunës së Prishtinës na kanë dëmtuar dhe ndoshta këta punëtorë mund të jenë 1 muaj eventualisht 2 muaj pa paga, për të cilët ne sigurisht nuk do të kemi shërbime pa na paguar”, tha Azemi.
Të pakënaqur me këtë gjendje janë shprehur vet punonjësit e shkollave.
Feim Bislimi, përfaqësues i punëtorëve sindikalë në shkollën ekonomike “Hoxhë Kadri Prishtina” tha se pagat nuk i kanë marrë për muajin shkurt dhe kjo u ka rënduar gjendjen ekonomike.
Kurse Idriz Makolli, punëtor teknik në një shkollë në kryeqytet, tha se kjo është e rëndë pasi janë shumë familje që mbesin në gjendje të vështirë pa paga.
