Kryediplomati grek në vizitën e gjashtë në Kosovë, Presidentja Osmani tregon çfarë folën në takim

Presidentja e Kosovës, Vjosa Osmani ka pritur sot në takim ministrin e Jashtëm të Greqisë, Nikos Dendias.

Osmani, siç është bërë e ditur në komunikatë, ka vlerësuar angazhimin proaktiv të Greqisë në rajonin tonë, si dhe mbështetjen e vazhdueshme të shtetit grek për integrimin e rajonit në Bashkimin Evropian.

“Në këtë frymë, Presidentja Osmani, duke u thirrur në vlerat e përbashkëta euroatlantike, ka kërkuar që mbështetja greke për anëtarësimin e Kosovës në institucionet euroatlantike të vazhdojë. Ndër të tjera, Presidentja Osmani ka theksuar se integrimi i plotë ndërkombëtar i Kosovës, përfshirë Bashkimin Evropian, NATO-n dhe Këshillin e Evropës, do t’i kontribuonte paqes së qëndrueshme në rajon.”, është bërë e ditur në komunikatë.

Tutje, Osmani ka falënderuar ministrin Dendias për mbështetjen e Greqisë për liberalizimin e vizave për qytetarët e Kosovës, në votimin e fundi të Këshillit të Bashkimit Evropian, si dhe për avokimin e vazhdueshëm për t’i dhënë fund këtij procesi.

Në lidhje me zhvillimet e fundit në procesin e dialogut me Serbinë, siç është bërë e ditur, Osmani ka theksuar se plani i zbatimit të marrëveshjes duhet të jetë në përputhje me Kushtetutën e Republikës, e cila do t’i kontribuojë paqes dhe stabilitetit afatgjatë në rajon, gjersa ka ritheksuar se koordinimi i Kosovës me aleatë në këtë proces do të vazhdojë.

“Në takim është diskutuar edhe për raportet Kosovë-Greqi, me ç’rast Presidentja Osmani ka shprehur gatishmërinë e thellimit të mëtutjeshëm të marrëdhënieve dyanëshe, duke përmendur nevojën e rritjes së shkëmbimit tregtar e ekonomik, si dhe bashkëpunimit në sfera të ndryshme të interesit të përbashkët.”, është bërë e ditur tutje në komunikatë.

Presidentja Vjosa Osmani e ka takuar ministrin e Jashtëm të Greqisë, Nikos Dendias.

Dendias ka ardhur sot për herë të gjashtë për vizitë në Kosovë.

Osmani tha se me kryediplomatin grek biseduan për bashkëpunimin dypalësh, dialogun me Serbinë e për zhvillimet e fundit në rajon.

“Diskutuam për përkushtimin tonë të përbashkët për ta forcuar bashkëpunimin dypalësh në mes të Kosovës dhe Greqisë, për procesin e dialogut me Serbinë, si dhe për zhvillimet e fundit në rajon”, shkroi Osmani në një postim në Facebook pas takimit.

“Kosova vazhdon të jetë e angazhuar për paqe afatgjate në rajon, forcim të demokracisë dhe integrim të plotë në institucionet euroatlantike”, shtoi ajo.

Presidentja e Kosovës, Vjosa Osmani, sot do ta pres në takim ministrin e Punëve të Jashtme të Greqisë, Nikos Dendias.

Takimi do të zhvillohet në ora 11:00, ka njoftuar kabineti i presidentes.

Kujtojmë se Greqia është një nga pesë shtetet e Bashkimit Evropian që ende nuk e kanë njohur Kosovën.

Megjithatë, dy shtetet mbajnë raporte normale diplomatike dhe tregtare.

Zyrtarët e Kosovës dhe ata grekë zhvillojnë takime zyrtare të ndërsjella në Prishtinë dhe Athinë dhe pos kësaj, Kosova dhe Greqia kanë shkëmbime tregtare dhe flasin shpesh për bashkëpunim të mëtutjeshëm ekonomik.