Deputetja nga Lëvizja Vetëvendosje, Jeta Statovci në një lidhje direkte nga Strasburgu tha se plani evropian ishte në mesin e temave të trajtuara në takimet e deputetëve të Kosovës me eurodeputetët.
Statovci tha se nga përmbajtja e popozimi evropian ka elemente pozitive që synojnë avancimin e statusit diplomatik të Kosovës.
“E shohim të nevojshme, gjithashtu jashtëzakonisht edhe të rëndësishme dhe historike çështjen e normalizimit dhe çështjen e avancimit në kuadër të dialogut mes Kosovës dhe Serbisë. Aty janë trajtuar përmbajtjet e kësaj, gjithashtu dakordanca e kryeministrit në parim për përmbajtjen e marrëveshjes. Por, që padyshim që për të arritur në një dakordancë të tillë kjo çështje kërkon vullnet të dyanshëm. Ka elemente pozitive që padyshim e avancojnë statusin diplomatik të Kosovës duke përfshirë respektimin e integritetit territorial, çështjen e respektimit të simboleve, mos bllokimit të njëra tjetrës në kuadër të avancimit në anëtarësim në organizata ndërkombëtare”, tha ajo.
Për pritjet e eurodeputet për takimin e 18 marsit mes kryeministrit të Kosovës, Albin Kurtit dhe presidentit serb, Aleksandar Vuçiq, Statovci thotë se shumica e eurodeputetëve kanë indikacione pozitive.
“Shumica prej tyre thonë që të kenë marrë indikacione pozitiva karshi dialogut dhe karshi marrëveshjes nga të dyja palët, si në aspektin e çështjeve të ngritura, si në aspektin e marrëveshjes. Dhe, kjo pritet të konkretizohet edhe në ditët e ardhshme”, tha ajo.
Ndërkaq, kryeministri i Kosovës, Albin Kurti, në fjalimin e tij në takimin e Komitetit Parlamentar ka thënë se Kosova është e përkushtuar, konstruktive dhe kreative në dialogun Kosovë – Serbi.
