Kameramani i njohur kosovar i Associated Press, Sylejman Kllokoqi, ka treguar se pas xhirimit të masakrës së Abrisë që ka ndodhur gjatë luftës së fundit në Kosovë është rrahur nga sigurimi serb.
Kllokoqi ka thënë se rëndësinë e xhirimit e ka kuptuar pas takimit me profesorin Fehmi Agani, i cili i ka thënë se me atë xhirim ka bërë një bujë të madhe.
“Sigurimi shtetëror më thirri dhe më rrahën, reagoj pija? Sigurisht poshtë-lartë jam lëshuar në orën 03:00. Por, misioni më kujtohet të nesërmen LDK-ja ku mblidhej ku e ka pas selinë, e takoj Fehmi Aganin, më përqafoi, më shtrëngoi shumë. Mas rrahjes erdh më tha Syl, me ketë xhirim e ke bërë një poterë shumë të madhe, po më vjen mirë që po të shoh mirë dhe më tha se erdhi misioni i Walkerit, kjo është në historinë e parë në historinë e vetme të Kosovës, kur hera e parë hynë trupat ose misioni i jashtëm i OSBE-së”, ka treguar Kllokoqi.
Sipas Kllokoqit, xhirimi i tij ka qenë dëshmi me atë se çfarë po ndodhte në Kosovë.
“Mas xhirimit erdhën, xhirimi ia u hapi sytë se çfarë ka ndodhur. Sidomos është ajo fotografia shumë e fortë nana me dy fëmijë, me cuclla. Atë e fotografoi Adami dhe e di që ka marrë shpërblim botëror, evropian me atë fotografi. D.m.th., mas xhirimit tim, pas Abrisë”, tha ai.
Kllokoqi ka thënë se masakra e Abrisë ka qenë ajo që e ka sjellur misionin e William Walkerit në Kosovë.
“Abrija e ka pru misionin e Wolkerit. Ka pas masakra shumë më të mëdha se Abrija, por nuk janë filmuar. Kur i ki të filmuara ke dëshmi në duar, mandej janë dëshmi se kur ta dërgon Associated Press gjithë bota i besoi. Nëse do ta xhiroje ti si një njëri i thjeshtë, ndryshe a e kishë marrë bota a se kishë marrë. Po kështu ka qenë një garancë që ky njeri është duke punuar në Associated Press dhe ajo e ka bë fotografinë më të fuqishme që ka pas shikim në botë dhe ku u mbledh Evropa, bota dhe e dërguan misionin e Walkerit në Kosovë", ka treguar tutje kameramani.
Më 26 shtator të vitit 1998, forcat serbe vranë dhe masakruan 23 anëtarë të familjes Deliu në fshatin Abri e Epërme të Drenasit. Në mesin e të vrarëve ishin gra, fëmijë e pleq, nga mosha gjashtë muajsh deri në 94 vjeç . Sipas mediave ndërkombëtare, masakra e Abrisë është një nga krimet më të tmerrshme të gjenocidit që Serbia ka kryer mbi shqiptarët e Kosovës.
