Kryetari i Kuvendit të Kosovës, Glauk Konjufca, më 8 maj, kishte deklaruar se Kosova nuk ka çfarë të kërkojë në dialog me Serbinë, nëse zgjidhja apo marrëveshja potenciale nuk e ka bazë Kushtetutën e Kosovës.
Sipas tij, zgjidhja e vetme është nëse respektohet Kushtetuta, përndryshe Kosova nuk ka interesa ta vazhdojë dialogun me Serinë.
Lidhur me këtë deklaratë, Asdren Shala nga radhët e Partisë Socialdemokrate, ka thënë se kryeparlamentari Konjufca nuk ka fuqi ta ndalë procesin e dialogut dhe sipas tij, ai ka dhënë vazhdimisht deklarata të tilla që nuk janë mbajtur.
“Deklarata e Glaukut është në natyrën e deklaratave të zakonshme që diçka tjetër ndodhë në dialog diçka tjetër mundohet Qeveria me na e shitë neve këtu në Kosovë. Për ne është e parëndësishme, për ne problemi është si do të jetë epilogu, e që ne e kemi analizuar që do të jetë i dëmshëm”.
“Një person që disa herë me deklarata të veta, i ka shkelë apo i ka tërheqë fjalët e veta 20 herë pse me besu që të 21-tën herë e ka saktë. E kemi pa që ka thënë “Asociacion as asi as ksi”, tash ka dalë mas dy viteve po thotë që ky dialog qenka i keq. Është lojë e famshme, Qeveria ka kriju univers paralel, jo duke u marrë me probleme reale, ka kriju univers apo klimë tjetër me ndodhë diçka tjetër me shitë. Nuk ka fuqi Glauku me lënë dialogun ose shkon te shtëpia”, ka deklaruar Shala.
