Presidenti i Serbisë, Aleksandër Vuçiq, ka pretenduar se situata në Kosovë është jashtëzakonisht e vështirë.
Ai ka deklaruar kështu për televizionin publik serb, teksa tha se bojkoti i institucioneve të Kosovës solli në ruajtje të paqes dhe stabilitetit.
“Situata në Kosovë është jashtëzakonisht e vështirë, por falë durimit, urtësisë, si dhe bojkotit të institucioneve shqiptare në veri, arritëm të ruajmë paqen dhe stabilitetin”, tha ai.
Vuçiq i ka reaguar edhe emisarit të SHBA-së për Ballkanin Perëndimor, Gabriel Escobar, pasi që ky i fundit tha se po pret draft-statutin për Asociacionin e Komunave me shumicë serbe.
“Escobar thotë – tani presim propozimin e Kosovës për Asociacionin. Më duhet t’ia kujtoj dhe ai nuk do të më falë për këtë – të kthehet dhe të rinovojë materialin, të lexojë se çfarë është shkruar në Marrëveshjen e Brukselit dhe anekset. Autoritetet e Prishtinës nuk kanë asnjë autoritet as kompetencë as çfarë propozimesh nuk kanë të drejtë të bëjnë”, ka deklaruar më tej Vuçiq.
Ai tha se autoriteti i vetëm kompetent për këtë është Ekipi Menaxhues i Asociacionit.
