Deputetja nga radhët e PDK-së, Ariana Musliu Shoshi, ka reaguar në lidhje me deklaratat e fundit të Ambasadorit të SHBA-së, Jeffrey Hovenier.
Musliu Shoshi, përmes një postimi në Facebook, ka thënë se Kosova pa SHBA-në, pushon së ekzistuari dhe se Qeveria Kurti po i cenon raportet me aleatët e saj e në veçanti me SHBA-në.
Tutje, ajo ka thënë se Kurti këto ditë ka arritur ta bëjë atë që Serbia do të jepte miliarda euro, fushata e vite të tëra e përsëri s’do të arrinte ta bënte.
Ajo ka kërkuar nga Kurti dhe Qeveria e tij që të japin dorëheqje dhe Kosova të formojë një qeveri teknike që e nxjerr nga kjo situatë.
Postimi i plotë:
Kosova meriton më shumë e meriton më mirë! Kosova përkrahë ShBA-së rrugëton si shtet. Kundër ShBA-së, Kosova pushon së ekzistuari!
Kjo qeverisje, e udhëhequr nga Albin Kurti & co., në mënyrën më të rrezikshme po i cënon raportet e Kosovës me të gjithë aleatët e saj – e veçanërisht, me ShBA-në. Në emër të shtrirjes së sovranitetit, Kurti po e de-legjitimon në tërësi shtetësinë e Kosovës.
Vetëm në ditët e fundit, Albin Kurti dhe kllika e tij kanë arritur ta bëjnë atë që Serbisë do t’i duheshin miliarda euro fushata e vite të tëra, e përsëri s’do ta arrinte: prishjen e aleancave strategjike të Kosovës dhe sanksionimin e kësaj të fundit.
Albin Kurti sillet sikur të ishte kryeministër i një superfuqie nukleare. Albin Kurti jo aq ngadalë, por shumë sigurtë, po i zhbën të gjitha investimet që lidershipi kosovarë i ka bërë që nga fillim-vitet ’90.
Albin Kurti gjithnjë ka qenë i pozicionuar gabimisht: si në Rambuje, si në negociata të Vjenës, si karshi Pakos së Ahtisaarit, si në shpalljen e pavarësisë! Albin Kurti me politikat e tij, më së miri po i shkon për shtati politikës serbe!
Albin Kurti dhe qeveria e tij duhet që sot të japin dorëheqje! Kosova duhet menjëherë të formojë një qeveri teknike, e cila na nxjerrë nga kjo katrahurë! Aventura të tilla nuk duhet të tolerohen as edhe një moment më shumë!
