Kryeministri Albin Kurti gjatë vizitës së sotme në Mbretërinë e Bashkuar e ka takuar edhe ish-kryeministrin britanik Tony Blair.
I pari i ekzekutivit në një postim në “Twitter” ka thënë se gjatë këtij takimi e ka falënderuar Blairin për rolin që ai e ka luajtur në çlirimin e Kosovës nga okupimi dhe në ndërtimin e një shteti demokratik.
“Shumë i lumtur që pata mundësinë ta takojë ish-kryeministrin e Britanisë së Madhe, Tony Blair. E falënderova për rolin e tij në përfundimin e okupimit të Kosovës, duke bërë të mundur që ne të ndërtojmë një shtet të vërtetë demokratik. E njoftova po ashtu për progresin e brendshëm dhe konstruktivitetin e Kosovës në dialogun me Serbinë”, ka shkruar Kurti.
Roli i Tony Blair në çlirimin e Kosovës në vitin 1999 ishte shumë i rëndësishëm.
Ai në atë kohë ishte kryeministër i Mbretërisë së Bashkuar dhe ishte një ndër liderët kryesorë pro bombardimeve ajrore kundër forcave serbe të drejtuara nga Sllobodan Millosheviq në Kosovë.
