Shtetasja shqiptare në Izrael, Felicita Jakoel, ka rrëfyer sesi sipas saj Izraeli po përballet me sfidën më serioze në historinë e tij nga lufta aktuale.
Sipas saj, përgjigja ndaj Hamasit, do të ketë pasoja të mëdha, në humbjen e jetëve të pafajshme.
“Hamasit do t’i jepet përgjigje, por përgjigja që do t’i jepet Hamasit është e ndërlikuar sepse ai fshihet mbas spitaleve mbas shkollave mbas ndërtesave ku janë vendosur gazetarët. Dhe kjo lloj përgjigje do të sjell patjetër edhe humbjen e jetëve të pafajshëm, dhe për këtë neve na vjen keq sepse e kemi kaluar vet këtë gjë”, ka thënë ajo.
Po ashtu, ajo ka treguar se gjendja në Izrael vazhdon të jetë shumë e rëndë, pasi sipas saj, ka përplasje në zonën e Gazës.
“Ushtria izrealite që tani është mobilizuar po përballët me Rripin e Gazës”, ka thënë ajo.
Ajo ka theksuar se numri i të vrarëve është rritur shumë shpejt dhe përfshin më shumë se “1 mijë e 200 viktima, shumicën e të cilëve janë të rinj, dhe pjesa tjetër janë civilë që janë masakruar në mënyrën më brutale”.
Ajo e ka krahasuar situatën me masakrat e nazistëve gjatë Luftës së Dytë Botërore, pasi sulmuesit “kanë hyrë në shtëpitë e njerëzve dhe kanë vrarë fëmijë dhe bebe, duke shkaktuar tmerr në popullsinë civile”.
Në përfundim, Jakoel ka theksuar se pjesa më e madhe e popullsisë izraelite është për krijimin e një shteti palestinez paqësor, por jo me Hamasin, pasi ky grup “është i rrezikshëm jo vetëm për Izraelin, por edhe për paqen dhe stabilitetin në rajon”.
