Kryetarja e Komisionit për Integrim Evropian, Rrezarta Krasniqi, ka marrë sot pjesë në Konferencën parlamentare në Tiranë “Roli i Parlamenteve në Procesin e Berlinit”, bashkorganizuar nga Kuvendi i Shqipërisë dhe projekti Diplomacia parlamentare: “Bashkëpunimi rajonal përmes dialogut të intensifikuar parlamentar", i mbështetur nga Gjermania dhe i udhëhequr nga Demokracia për Veprim.
Përmes kësaj konference gjashtë vendet e Ballkanit Perëndimor kanë diskutuar lidhur me nevojën e inkuadrimit të dimensionit parlamentar në kuadër të procesit të Berlinit.
Deputetja Krasniqi theksoi se Kosova është vend demokratik dhe e përkushtuar në rrugëtimin integrues evropian, përmirësimin e jetës së qytetarëve dhe orientimin perëndimor euro-atlantik, në përkrahje dhe të rreshtuar me SHBA-në, NATO-n dhe BE-në.
Ajo gjithashtu ka ngritur shqetësimin se më 24 shtator në Banjskë në Komunën e Zveçanit, është kryer një sulm terrorist serb, të cilët kanë qenë të pajisur me armatime, maska dhe uniforma, ku kanë vrarë një polic dhe kanë plagosur dy të tjerë.
Duke e dënuar ashpër këtë sulm terrorist, Krasniqi ka kërkuar nga Serbia që të heqë dorë nga përkrahja dhe strehimi i kriminelëve serbë dhe t`i ekstradojë sa më shpejtë në shtetin e Kosovës.
Kryetarja e komisionit ka shtuar se nëse Serbia vazhdon të mbështesë këta kriminelë dhe nuk i dorëzon që të përballen me drejtësinë, atëherë kjo është një dëshmi e qartë se ajo ende çalon duke mos respektuar parimet e bashkëpunimit rajonal dhe ndërfqinjësor, promovimi i të cilave është arsye pse mbahen konferenca të tilla.
Procesi i Berlinit ka një mbështetje të plotë nga Komisioni për Integrim Evropian i Kuvendit të Republikës së Kosovës, pasi që është organizimi i vetëm i cili ka treguar suksese konkrete në raport me gjashtë shtetet e Ballkanit Perëndimor.
Në fund të takimit, pjesëmarrësit nga Shqipëria, Kosova, Mali i Zi, Maqedonia e Veriut, Bonja-Hercegovina dhe Serbia u dakorduan për një deklaratë të përbashkët që të avancojnë edhe më tej bashkëpunimin ndërparlamentar në kuadër të procesit të Berlinit, thuhet në një postim të Kuvendit të Kosovës në Facebook.
