Deputetja e PDK-së, Ariana Musliu-Shoshi, ka kërkuar nga kryeministri Albin Kurti që të tregojë se cili është qëllimi i vizitës së pesë emisarëve të dialogut, të cilët nesër do ta vizitojnë Kosovën.
Ajo ka thënë se kryeministri Kurti po bëhet joserioz duke mos u deklaruar qëllimet e kësaj vizite.
“Nuk e kemi asnjë informatë që unë sot me jep opinionit, se çka do të ndodh të shtunën. Duhet z. Kurtit të jetë i sinqertë me qytetarët e këtij vendi, duhet të tregojë se për çka qëndron, për çka vijnë, çka do ti kërkojnë”, ka thënë Musliu-Shoshi për RTK.
Ajo ka thënë se Kurti i ka ndërruar kauzat me të ardhur në pushtet.
“Në kemi nevojë për një kryeministër serioz, i cili i di obligimet e tij ndërkombëtare, e di për çka qëndron, i di kauzat e tij, që ia premtoj elektoratit të tij para se të marr karrigen e kryeministrit dhe jo të shndërrohet në një kryeministër tjetër me kauza komplet tjera në momentin që ia bëhet kryeministër”, ka thënë ajo.
