Avokati Valdet Hoxha, ka thënë se partnerët ndërkombëtarë do të duhej që t’ia tërheqin “veshin” Serbisë për shkak se sipas tij është pala destruktive, ndërsa siç thekson ai kryeministri i Kosovës, Albin Kurti, po e tepron me gatishmërinë e tij për të nënshkruar.
Në emisionin “Five”, ku po diskutohet për draft-statutin e asociacionit të Komunave me Shumicë serbe, Hoxha ka thënë se kjo temë kërkon një urgjencë që ka një bazë e këtë e konfirmon edhe ekzistimi i draftit të statutit.
“Kjo temë kërkon një urgjencë që ka një bazë e këtë e konfirmon edhe ekzistimi i draftit final të statutit, ka një urgjencë rreth kësaj teme që është çështje muajsh sepse janë zgjedhjet në Serbi. Partnerët ndërkombëtarë do të duhej që këtë urgjencë që po e kërkojnë nga ne, do të duhej t’ia tërheqin veshin Serbisë sepse ajo është pala destruktive. Kurti po e tepron me gatishmërinë e tij për të nënshkruar ndërsa pala tjetër reziston dhe ka dalë hapur se nuk do të lejojë që Kosova të anëtarësohet në organizata ndërkombëtare”, tha ai.
Se a është ky draft i pranueshëm për Kosovën, Hoxha thekson se i njëjti është thikë me dy teha.
“Si statut i Asociacionit, si temë ndoshta nuk do të ishte i nevojshëm sepse komunitetet tjera në vend i kanë të gjitha të drejtat por tashmë është fakt i kryer. Ideja është që të kemi një Asociacion që në të ardhmen mos të shndërrohet në problem të zhvillimit dhe ekzistimit të vetë shtetit”.
“Statuti aktual që po e shohim, besoj që është i përafërt, është thikë me dy teha në aspektin juridik ka disa siguresa nëse e shohim nga përkufizimet ku përmendet në mënyrë të kristaltë Republika e Kosovës, Gjykata Kushtetuese, Presidenca, i jep një kristalizim ekzistimit të shtetit të Kosovës por pastaj rreziqet janë brenda neneve të caktuara sidomos te vegëza, amandamentimi i statutit pasi tëkonstituohen organet e Asociacionit”, shtoi ai.
