Këshilli Prokurorial i Kosovës (KPK) ka mbajtur sot takimin e jashtëzakonshëm, i cili është udhëhequr nga zëvendëskryesuesi Veton Shabani.
Në një komunikatë për media thuhet se anëtarët e KPK-së trajtuan kundërshtimin e prokurores Fitore Sadikaj lidhur me mos konfirmimin e statusit të kandidatit për pozitën e kryeprokurorit të Prokurorisë Themelore në Prishtinë.
Pas refuzimit të kundërshtimit, anëtarët e KPK-së miratuan listën përfundimtare me kandidatin Zejnullah Gashi si kryeprokuror i ri i Prokurorisë Themelore në Prishtinë.
KPK-ja miratoi listën prej katër kandidatësh për pozitën e kryeprokurorit të Prokurorisë Speciale të Kosovës: Blerim Isufaj, Valdet Gashi, Atdhe Dema dhe Naim Abazi, njofton Njësia për Komunikim Publik e KPK-së.
